Silicon Valley Bank | కాలిఫోర్నియా, మార్చి 11: అమెరికాలో ఎన్నో టెక్నాలజీ స్టార్టప్లకు బాసటగా నిలిచిన అక్కడి సిలికాన్ వ్యాలీ బ్యాంక్ (ఎస్వీబీ) కేవలం 48 గంటల్లో నిండా మునగడానికి బీజం పడింది గత వారమే. ఎస్వీబీ క్రెడిట్ (రుణ పత్రాలు, బాండ్లు) డౌన్గ్రేడ్ చేయనున్నట్టు రేటింగ్ ఏజెన్సీ మూడీస్ ఇన్వెస్టర్ సర్వీసెస్… ఎస్వీబీ మాతృసంస్థ ఎస్వీబీ ఫైనాన్షియల్ గ్రూప్నకు ఆందోళనకరమైన వార్తని చేరవేసింది. మూడీస్ నుంచి ఆ ఫోన్కాల్తో వెనువెంటనే జరిగిన పరిణామాలు 2008 లేమాన్ బ్రదర్స్ ఆర్థిక సంక్షోభం తర్వాత మరో పెద్ద బ్యాంక్ దివాళాకు కారణమయ్యాయి. ఈ పరిణామాలతో సంబంధం ఉన్న వ్యక్తులు అందించిన వివరాలివి…
కొద్ది నెలల క్రితం ట్విట్టర్ను టేకోవర్ చేసిన టెస్లా చీఫ్ ఎలాన్ మస్క్ తాజాగా సిలికాన్ వ్యాలీ బ్యాంక్ పట్ల ఆసక్తి ప్రదర్శించారు. ఎస్వీబీ ఆస్తుల్ని విక్రయించడానికి అమెరికా రెగ్యులేటర్లు రిసీవర్ను నియమించిన నేపథ్యంలో ‘ఎస్వీబీని ట్విట్టర్ కొనుగోలు చేసి, దానిని డిజిటల్ బ్యాంక్గా మార్చే ఆలోచన చేయాలి’ అంటూ రాజేర్ సీఈవో మిన్ లియాంగ్ టాన్ ట్వీట్ చేశారు. అందుకు బదులుగా మస్క్ స్పందిస్తూ అటువంటి అలోచనను తాను స్వాగతిస్తున్నానని అన్నారు.
అంతర్జాతీయ స్టార్టప్ల్లో పెట్టుబడులకు ప్రత్యేక సంస్థగా పేరొందిన సిలికాన్ వ్యాలీ బ్యాంక్ మూసివేతకు గురికావడంతో భారత్లోని స్టార్టప్ సమాజం షాకయ్యింది. ఎస్వీబీ ఖాతాదారుల్లో సాఫ్ట్వేర్ యూనీకార్న్లు, సాస్ (సాఫ్ట్వేర్ యాజ్ ఏ సర్వీస్) కంపెనీలు ఉన్నాయి. చాలావరకూ సాస్ కంపెనీలు భారత్ కేంద్రంగా కార్యకలాపాలు నిర్వహిస్తూ ఇంటర్నెట్ ద్వారా సర్వీస్ రూపంలో అప్లికేషన్లను డెలివరీ చేస్తుంటాయి. కానీ అవి యూఎస్లో రిజిష్టర్ అయ్యేందుకు మొగ్గుచూపుతుంటాయి.
ఎందుకంటే అక్కడ రిజిష్టర్ అయితే అంతర్జాతీయ మార్కెట్లకు సులభంగా చేరువ కావొచ్చని, యూఎస్ వెంచర్ క్యాపిటలిస్టుల నుంచి నిధులు లభిస్తాయన్నది ఆశ. వాటిలో పలు సంస్థలు ఎస్వీబీ ఆర్థిక సహకారం పొందుతున్నవే. డిపాజిట్లు కలిగి ఉన్నవే. వాటికి ప్రత్నామ్నాయ అమెరికా బ్యాంక్ ఖాతా ఏదీ లేనందున, ఇప్పుడు ఎస్వీబీ నుంచి నిధుల్ని వేగంగా బదిలీ చేసుకోలేని ఇబ్బందుల్లో పడ్డాయి.
ఆ బ్యాంక్ నుంచి త్వరితంగా డబ్బు బదిలీ చేసుకోకపోతే రిసీవర్ ఆస్తులు విక్రయించేంతవరకూ నిధులు ఫ్రీజ్ అవుతాయని సీడ్ ఇన్వెస్టర్ ష్రిష్టి సాహు హెచ్చరించారు. 21 భారతీయ స్టార్టప్ల్లో సిలికాన్ వ్యాలీ బ్యాంక్ పెట్టుబడులున్నట్టు ట్రాకింగ్ ప్లాట్ఫామ్ ట్రాక్సన్ డాటా వెల్లడిస్తున్నది. పూనెకు చెందిన యూనీకార్న్ ఐసెర్టిస్లో ఎస్వీబీకి పెద్ద పెట్టుబడి ఉంది. ఈ ఆర్థిక సహకారాన్ని రివాల్వింగ్ క్రెడిట్ లైన్, కన్వర్ట్బుల్ ఫైనాన్సింగ్ రూపంలో ఎస్వీబీ అందిస్తున్నది. మరోవైపు అమెరికా బ్యాంక్ల నుంచి ఇండియాకు వేగంగా నిధులు తీసుకొచ్చే సహాయం చేయడానికి ఫిన్టెక్ సంస్థ రేజర్ పే ఒక ప్రత్యేకమైన డెస్క్ నెలకొల్పింది.
ప్రస్తుతం ఎస్వీబీ వద్ద 175 బిలియన్ డాలర్ల డిపాజిట్లు ఉన్నాయని అంచనా. అందులో 89 శాతానికి బీమా లేదని సంబంధిత వర్గాలు తెలిపాయి. 2.50 లక్షల డాలర్ల డిపాజిట్లకే ఇన్సూరెన్స్ ఉంటుంది. మార్చి 13న బ్యాంక్ శాఖలన్నింటినీ తెరుస్తామని ఇన్సూరెన్స్ కలిగిన డిపాజిట్లను విత్డ్రా చేసుకోవడానికి అవకాశం కల్పిస్తామని అమెరికా రెగ్యులేటర్లు తెలిపారు.