Secured Credit Card | సెక్యూర్డ్‌ క్రెడిట్‌ కార్డు అంటే ఏంటి?.. వాటిని ఎవరికి ఇస్తారు?

మీరెక్కడా ఇప్పటిదాకా రుణాలు తీసుకోకుంటే మీకు రుణ చరిత్రే ఉండదు, రుణ ఎగవేతలున్నా క్రెడిట్‌ స్కోర్‌ బాగుండదు.. అప్పుడు మీ క్రెడిట్‌ కార్డ్‌ దరఖాస్తు తప్పకుండా తిరస్కరణకు గురవుతుంది. అలాంటివారి ఆర్థిక అవసరాలకు సెక్యూర్డ్‌ క్రెడిట్‌ కార్డులు సరిపోతాయి.

Secured Credit Card | మీరెక్కడా ఇప్పటిదాకా రుణాలు తీసుకోకుంటే మీకు రుణ చరిత్రే ఉండదు, రుణ ఎగవేతలున్నా క్రెడిట్‌ స్కోర్‌ బాగుండదు.. అప్పుడు మీ క్రెడిట్‌ కార్డ్‌ దరఖాస్తు తప్పకుండా తిరస్కరణకు గురవుతుంది. అలాంటివారి ఆర్థిక అవసరాలకు సెక్యూర్డ్‌ క్రెడిట్‌ కార్డులు సరిపోతాయి. రుణ చరిత్ర, క్రెడిట్‌ స్కోర్లతో సంబంధం లేకుండా బ్యాంకులు ఈ సెక్యూర్డ్‌ క్రెడిట్‌ కార్డులను జారీ చేస్తాయి మరి.

సెక్యూర్డ్‌ క్రెడిట్‌ కార్డు అంటే?

సెక్యూర్డ్‌ క్రెడిట్‌ కార్డులను నగదు పూచీకత్తుపైనే జారీ చేస్తారు. క్రెడిట్‌ కార్డు బకాయిల చెల్లింపుల్లో ఎగవేతలకు ఆస్కారమున్నప్పుడు బ్యాంకర్లు తమ రక్షణార్థం వీటిని కస్టమర్లకు ఇస్తారు. దీనివల్ల కస్టమర్లు క్రెడిట్‌ కార్డు బిల్లులను చెల్లించలేకపోయినా బ్యాంకులకు నష్టం వాటిల్లదు. కార్డు కోసం పూచీకత్తుగా పెట్టిన నగదును ఆ బకాయిల కింద జమ చేసుకుంటారు. కార్డు పరిమితి రూ.50,000 కావాలనుకుంటే, అంతే మొత్తాన్ని డిపాజిట్‌ చేయాల్సి ఉంటుంది. రూ.3 లక్షలు లేదా రూ.5 లక్షలు కావాలన్నా.. అంతే మొత్తాలు డిపాజిట్‌ చేయాలి. మీరు చేసే డిపాజిట్లనుబట్టే మీరు పొందే క్రెడిట్‌ కార్డుకున్న రుణ పరిమితులు ఆధారపడి ఉంటాయి.

• విద్యార్థులు, అప్పుడప్పుడే సంపాదనలోపడ్డవారికి ఈ సెక్యూర్డ్‌ క్రెడిట్‌ కార్డులను ఎక్కువగా బ్యాంకింగ్‌ సంస్థలు సూచిస్తాయి. అలాగే ఇటీవలికాలంలో తీవ్ర ఆర్థిక ఇబ్బందులను చవిచూసినవారు.. క్రెడిట్‌ కార్డుల కోసం దరఖాస్తు చేసుకున్నా వారి క్రెడిట్‌ స్కోర్‌ తక్కువగా ఉంటుంది గనుక ఇవే వస్తాయి.
• రుణ చరిత్ర లేనివారికి ఈ కార్డుతో క్రెడిట్‌ స్కోర్‌ ఏర్పడుతుంది. సక్రమ లావాదేవీలతో క్రెడిట్‌ స్కోర్‌ను క్రమేణా పెంచుకోవచ్చు.
• ఈ సెక్యూర్డ్‌ క్రెడిట్‌ కార్డు.. రెగ్యులర్‌ క్రెడిట్‌ కార్డు మాదిరే ఉంటుంది. చెల్లింపులు, వడ్డీలు, జరిమానాల్లో ఏ తేడాలు ఉండవు.
• తొలుత తీసుకున్న సెక్యూర్డ్‌ క్రెడిట్‌ కార్డును క్రమశిక్షణతో వినియోగిస్తే క్రెడిట్‌ స్కోర్‌ పెరుగుతుంది. దాని ఆధారంగా రెగ్యులర్‌ అన్‌సెక్యూర్డ్‌ క్రెడిట్‌ కార్డులను పొందవచ్చు.