Retail Inflation | రిటైల్ ద్రవ్యోల్బణానికి మళ్లీ రెక్కలొచ్చాయి. 2023 డిసెంబర్ రిటైల్ ద్రవ్యోల్బణం నాలుగు నెలల గరిష్ట స్థాయి 5.69 శాతంగా నమోదైంది. 2023 నవంబర్లో 5.55 శాతం కాగా, 2022 డిసెంబర్లో 5.72 శాతంగా రికార్డైంది. ఆహార వస్తువుల ధరల వల్లే చిల్లర ద్రవ్యోల్బణం పైపైకి దూసుకెళ్లింది. 2022 డిసెంబర్ ఆహార వస్తువుల ద్రవ్యోల్బణం 4.19 శాతం కాగా, గత నెలలో 9.53 శాతంగా, 2023 నవంబర్ లో 8.7 శాతంగా రికార్డైంది.
ఆహార వస్తువుల ధరల్లో అనిశ్చితి చిల్లర ద్రవ్యోల్బణం పెరుగుదలకు కారణం అని ఆర్బీఐ గవర్నర్ శక్తికాంత దాస్ పేర్కొన్నారు. రోజువారీగా వినియోగించే కీలక కూరగాయల ధరల్లో పెరుగుదలతో సమీప భవిష్యత్లో సీపీఐ సూచీ మరింత పెరిగేందుకు సంకేతం అని అన్నారు. వేసంగి సీజన్లో విత్తుతున్న గోధుమలు, పప్పు ధాన్యాలు, మసాలా దినుసుల పరిస్థితులను పర్యవేక్సించాలని శక్తికాంత దాస్ చెప్పారు. అంతర్జాతీయ మార్కెట్లో పంచదార ధరలు పెరగడం కూడా ఆందోళనకరమేనన్నారు. వరుసగా నాలుగో నెలలో రిటైల్ ద్రవ్యోల్బణం ఆర్బీఐ నియంత్రణ స్థాయి కంటే ఎక్కువగా నమోదైంది.
మరోవైపు, పారిశ్రామిక ఉత్పత్తి సూచీ (ఐఐపీ) నవంబర్ గణాంకాలు 2.4 శాతానికి పడిపోయాయి. గతేడాది మార్చిలో నమోదైన ఐఐపీ 1.7 శాతమే. 2022 నవంబర్ నెలతో పోలిస్తే పారిక్రామిక వ్రుద్ధి నెమ్మదిగా 1.2 శాతం పెరుగుతున్నది. దుస్తులు, ఫర్నీచర్, కంప్యూటర్, ఎలక్ట్రానిక్ అండ్ ఆప్టికల్ ప్రొడక్ట్ ఇండస్టీస్లో 20 శాతానికి పైగా డీ-గ్రోత్ నమోదైంది.