CBDC-RBI | డిజిటల్ రూపీ ప్రయోగాత్మక ఫలితాలు ఆశాజనకంగా ఉన్నాయని ఆర్బీఐ వెల్లడించింది. సెంట్రల్ బ్యాంక్ డిజిటల్ కరెన్సీ (సీబీడీసీ)గా పిలిచే ఈ-రూపీపై ప్రయోగాలను విస్తరిస్తున్నట్లు తెలిపింది. గతేడాది నవంబర్ ఒకటో తేదీన హోల్సేల్ విక్రయాల్లో, డిసెంబర్ ఒకటో తేదీ నుంచి డిజిటల్ రూపీ ప్రయోగాలు ఆర్బీఐ ప్రారంభించింది.
తొలుత ముంబై, ఢిల్లీ, బెంగళూరు, భువనేశ్వర్ నగరాల్లో ప్రయోగాత్మకంగా ఈ-రూపీ వినియోగం తీరును ఆర్బీఐ పరీక్షించింది. సెలెక్టెడ్ కస్టమర్లు, వ్యాపారుల మధ్య వినియోగించారు. తదుపరి అహ్మదాబాద్, చండీగఢ్, గ్యాంగ్టక్, గువాహటి, హైదరాబాద్, ఇండోర్, కోచి, లక్నో, పాట్నా, సిమ్లా నగరాల్లోనూ ఈ ప్రయోగాలు ప్రారంభిస్తున్నామని ఆర్బీఐ వెల్లడించింది.
తొలుత ఎస్బీఐ, ఐసీఐసీఐ బ్యాంకు, యస్ బ్యాంక్, ఐడీఎఫ్సీ ఫస్ట్ బ్యాంకుతో డిజిటల్ రూపీ ప్రయోగాలను ఆర్బీఐ ప్రారంభించింది. అటుపై బ్యాంక్ ఆఫ్ బరోడా, హెచ్డీఎఫ్సీ బ్యాంక్, కొటక్ మహీంద్రా బ్యాంక్, యూనియన్ బ్యాంక్ ఆఫ్ ఇండియాల్లో పరీక్షించారు. తాజాగా పంజాబ్ నేషనల్ బ్యాంక్ (పీఎన్బీ), ఫెడరల్ బ్యాంక్, ఇండస్ ఇండ్ బ్యాంక్, కెనరా బ్యాంక్, యాక్సిస్ బ్యాంకుల్లో ఈ-రూపీ వాడకం పరీక్షిస్తారు.