బహుమతిగా మ్యూచువల్‌ ఫండ్స్‌..

మీ పిల్లలకు మ్యూచువల్‌ ఫండ్స్‌ను బహుమతిగా ఇవ్వాలనుకుంటున్నారా? అయితే ఈ కొత్త నిబంధనలను తెలుసుకోవాల్సిందే. నిజానికి పిల్లల దీర్ఘకాల సంపద నిర్మాణానికి మ్యూచువల్‌ ఫండ్స్‌ బహుమతి అనేది ఎప్పట్నుంచో ఉన్న చక్కని మార్గం.

• పిల్లలకు బదిలీ ముందు తల్లిదండ్రులు తెలుసుకోవాల్సిందేంటి?

మీ పిల్లలకు మ్యూచువల్‌ ఫండ్స్‌ను బహుమతిగా ఇవ్వాలనుకుంటున్నారా? అయితే ఈ కొత్త నిబంధనలను తెలుసుకోవాల్సిందే. నిజానికి పిల్లల దీర్ఘకాల సంపద నిర్మాణానికి మ్యూచువల్‌ ఫండ్స్‌ బహుమతి అనేది ఎప్పట్నుంచో ఉన్న చక్కని మార్గం. కానీ ఇటీవల వచ్చిన రూల్స్‌.. ఈ ప్రక్రియను చాలా సంక్లిష్టం చేశాయి. కాబట్టి డీమ్యాట్‌ అవసరాల నుంచి పన్ను సమస్యల వరకున్న నూతన విధివిధానాలను తల్లిదండ్రులు తప్పక తెలుసుకోవాలి. అప్పుడే పొరపాట్లను అధిగమించి అనుకున్నది సజావుగా సాగగలదు.

• నగదు, బంగారంలా కాకుండా.. మ్యూచువల్‌ ఫండ్‌ యూనిట్లను పన్ను చట్టం కింద మూలధన ఆస్తులుగా పరిగణిస్తారు. అందుకే బదిలీ, పన్నుల విషయంలో కొన్ని నిబంధనలు వర్తిస్తాయి.
• మ్యూచువల్‌ ఫండ్‌ యూనిట్లను డీమ్యాట్‌ రూపంలోనే బహుమతిగా ఇవ్వవచ్చు. కనుక తల్లిదండ్రులు తమ హోల్డింగ్స్‌ను ముందే డీమ్యాట్‌లోకి మార్చాలి. గిఫ్ట్‌ డీడ్‌ను సృష్టించాలి.
• డీమ్యాట్‌ రూపంలోకి మారిన తర్వాత మీ బహుమతిని ఆఫ్‌-మార్కెట్‌ మార్గదర్శకాల ఆధారంగా బదిలీ చేసుకోవచ్చు. ఇందుకు రూ.25 లేదా బదిలీ విలువలో 0.03 శాతాన్ని (ఏది ఎక్కువైతే అది) ఫీజుగా చెల్లించాల్సి ఉంటుంది. దీనికి జీఎస్టీ, స్టాంప్‌ సుంకం అదనం.
• పన్ను చట్టాల కింద బహుమతులకు మినహాయింపు ఉన్నందున మీ మ్యూచువల్‌ ఫండ్స్‌ బహుమతిపై మూలధన లాభాల పన్ను ఉండదు.
• తల్లిదండ్రుల నుంచి మ్యూచువల్‌ ఫండ్స్‌ను బహుమతిగా తీసుకొనే పిల్లలూ పన్నుల్ని చెల్లించనక్కర్లేదు. అయితే కొంత కాలం తర్వాత వాటిని అమ్ముకున్నప్పుడు మాత్రం మూలధన లాభాల పన్నును చెల్లించాల్సి ఉంటుంది.
• పిల్లలు మైనర్లుగా ఉంటే.. బహుమతిగా ఇచ్చిన మీ మ్యూచువల్‌ ఫండ్స్‌ నుంచి వచ్చే ఆదాయం మీ (తల్లిదండ్రులు) ఆదాయం కిందకే వస్తాయి. అయినప్పటికీ ఏటా రూ.1,500 వరకు ఆదాయంపై పన్ను మినహాయింపు ఉంటుం ది. ఈ పరిమితి దాటితే మీ ఐటీ శ్లాబుల ప్రకారం పన్నులు తప్పవు. పిల్లల వయసు 18 ఏండ్లు నిండేదాకా ఇంతే.