Economic Survey | ఏటా 78 లక్షల ఉద్యోగాలు కల్పించాల్సిందే.. తేల్చి చెప్పిన ఆర్ధిక సర్వే..!

Economic Survey | ప్రతిఏటా 78 లక్షల మందికి తప్పనిసరిగా ఉద్యోగావకాశాలు కల్పించాల్సిన అవసరం ఉందని కేంద్ర ప్రభుత్వ ఆర్థిక సర్వే పేర్కొంది.

July 22, 2024 / 05:01 PM IST

Economic Survey | ఏటా 78 లక్షల ఉద్యోగాలు కల్పించాల్సిందే.. తేల్చి చెప్పిన ఆర్ధిక సర్వే..!

Economic Survey | ప్రతిఏటా 78 లక్షల మందికి తప్పనిసరిగా ఉద్యోగావకాశాలు కల్పించాల్సిన అవసరం ఉందని కేంద్ర ప్రభుత్వ ఆర్థిక సర్వే పేర్కొంది. 2024-25 ఆర్థిక సంవత్సరం వృద్ధి, దేశంలో ఆర్థిక పరిస్థితి స్థితిగతులపై కేంద్ర ఆర్థిక మంత్రి నిర్మలా సీతారామన్ సోమవారం పార్లమెంటులో ‘ఆర్థిక సర్వే’ను ప్రవేశ పెట్టారు. శ్రామికశక్తిని పెంపొందించడానికి వ్యవసాయేతర రంగంలో 2030 వరకూ ఏటా 78 లక్షల ఉద్యోగ అవకాశాలు కల్పించాల్సిందేనని ఆర్థిక సర్వే తేల్చి చెప్పింది. వ్యవసాయేతర రంగాల్లో ఉద్యోగాలు కల్పించాల్సి ఉందని పేర్కొన్న ఆర్థిక సర్వే.. 2023-24లో వ్యవసాయ రంగంలో శ్రామిక శక్తి 45.8 శాతం ఉందని, 2047 నాటికి అందులో నాలుగోవంతుకు తీసుకు రావాలని ప్రతిపాదించింది.

‘మహిళలకు ఉపాధి కల్పించే వ్యవసాయం, అనుబంధ రంగాల్లో ఉపాధి అవకాశాలకు ఉన్న ప్రాధాన్యానికి అనుగుణంగా వ్యవసాయేతర రంగాల్లో ఏటా 78 లక్షల మందికి ఉద్యోగాలు కల్పించాల్సి ఉంది’ అని ఆర్థిక సర్వే పేర్కొంది. తదనుగుణంగా గత ఐదేండ్లుగా ప్రొడక్షన్ లింక్డ్ ఇన్షియేటివ్ (పీఎల్ఐ) పథకాల ద్వారా 60 లక్షల మందికి, మిత్రా టెక్స్ టైల్ స్కీమ్, ముద్ర రుణాల ద్వారా 20 లక్షల మందికి ఉద్యోగాలు కల్పించినట్లు పేర్కొంది. కంపెనీల్లో ఫ్లెక్సీ వర్కర్ల నియామకం పెరుగుతున్నదని, అసంఘటిత రంగ కార్మికులకు సామాజిక భద్రత కల్పించాల్సిన అవసరం ఉందని ఆర్థిక సర్వే నొక్కి చెప్పింది.

‘దేశంలోని వివిధ కంపెనీల్లో సుమారు 54 లక్షల మంది ఫార్మల్ కాంట్రాక్ట్ స్టాఫ్ లేదా ఫ్లెక్సీ వర్కర్లు పని చేస్తున్నారు. వీరికి సకాలంలో వేతనాల చెల్లింపు, సామాజిక భద్రత, వైద్య బీమా వసతులు కల్పించాల్సిన బాధ్యత ఈ కంపెనీలపైనే ఉంది. కాంట్రాక్టు వర్కర్లకు పూర్తిగా సామాజిక భద్రత కల్పించాల్సిన బాధ్యత కంపెనీలదే. 2023లో సగటున కాంట్రాక్టు ఉద్యోగుల నియామకాలు 75 శాతానికి పైగా పెరిగాయి’ అని ఆర్థిక సర్వే వెల్లడించింది.