Loan Payments | గతంతో పోలిస్తే బ్యాంకుల్లో రుణాలు తేలిగ్గానే లభిస్తున్నాయి. ఇప్పటికే ఒక లోన్ తీసుకున్న వ్యక్తికి మరో రుణం కూడా మంజూరు చేస్తున్నాయి. ఫలితంగా చాలా మంది ఒకటి కంటే ఎక్కువ రుణాలు తీసుకున్న వారు ఉన్నారు. హోంలోన్ తీసుకున్న వారు.. తర్వాత రుణంపై కారు కొనుక్కోవచ్చు. ఎమర్జెన్సీ పరిస్థితులు తలెత్తినప్పుడు పర్సనల్ లోన్ తీసుకోవాల్సి రావచ్చు. ఒకటి కంటే రుణాలు ఎక్కువైతే నెలవారీ ఈఎంఐ’ల భారం కూడా పెరుగుతుంది. ఫలితంగా ఒక్కోసారి కొన్ని లోన్ల నెలవారీ వాయిదాలు పే చేయకపోవచ్చు. ఇటువంటి విపత్కర పరిస్థితులు తలెత్తకుండా ఉండాలంటే ఒక ప్లాన్ ప్రకారం రుణాల చెల్లింపులు జరుపడం ప్రతి ఒక్కరికీ శ్రేయస్కరం. హోం లోన్, పర్సనల్ లోన్, కారు లోన్ల్లో ఏది ముందుగా క్లియర్ చేయాలనే మీమాంస తలెత్తినప్పుడు అనుసరించాల్సిన టిప్స్ తెలుసుకుందామా..!
ఒకటి కంటే ఎక్కువ రుణాలపై నెలవారీ వాయిదా (ఈఎంఐ)లు చెల్లిస్తున్న వారు.. వాటిలో ఏ రుణానికి అధిక వడ్డీ భారం పడుతుందో గుర్తించాలి. వాస్తవంగా హోంలోన్, ఆటోమొబైల్ రుణం కంటే వ్యక్తిగత రుణం, క్రెడిట్ కార్డుపై లోన్ వంటి వాటికి ఎక్కువ వడ్డీ భారం పడుతుంది. కనుక ముందుగా పర్సనల్ లోన్, క్రెడిట్ కార్డు లోన్ చెల్లించడానికి ప్రాధాన్యం ఇస్తే మంచిది.
హోంలోన్, ఆటోమొబైల్ లోన్ ఉన్నప్పుడు కారు లేదా బైక్ లోన్ త్వరత్వరగా తీర్చేయడం మేలు. కారైనా.. బైక్ అయినా కాలం గడిచే కొద్దీ దాని విలువ తగ్గిపోతూ ఉంటుంది. దీనికి తోడు హోంలోన్తో పోలిస్తే ఆటోమొబైల్ లోన్ మీద వడ్డీ ఎక్కువే. కాబట్టి ఎంత త్వరగా కారు లేదా బైక్ లోన్ తీర్చేస్తే బెటర్. ఇంటి రుణం అనేది దీర్ఘకాలికం కొనసాగేది. ఆస్తిని సంపాదించుకోవడానికి సాయపడే లోన్ హోంలోన్. కనుక ఇంటి రుణం తీర్చేయడానికి కొంత టైం తీసుకున్నా పర్వాలేదు. ఒకవేళ ఇంటి రుణం సకాలంలో చెల్లించలేకపోతే తమ వారసులకు అప్పగించొచ్చు.
ఇంటి రుణం తీసుకున్న తర్వాత అవసరాలను బట్టి వెహికల్ లోన్తోపాటు పర్సనల్ లోన్ తీసుకోవాల్సి రావచ్చు. తర్వాత ఆర్థిక పరిస్థితి మెరుగు పడితే ఒక రుణం మాత్రమే కొనసాగించేందుకు ట్రై చేయొచ్చు. అలా చేయాలంటే హోం లోన్ మీద టాప్ అప్ లోన్ తీసుకుని పర్సనల్, వెహికల్ లోన్ బకాయిలు క్లియర్ చేసేయొచ్చు. ఇంటి రుణాలపై మాత్రమే టాప్ అప్ లోన్ ఇస్తారు. ఇంతకుముందే తీసుకున్న హోం లోన్తో సమానంగా గానీ, కాసింత ఎక్కువగా వడ్డీ ఉన్నా.. పర్సనల్ లోన్ మీద వడ్డీ కంటే తక్కువే సుమా..!
ఇక ఇంటి రుణంపై ఎంత టాప్ అప్ లోన్ వస్తుందన్న సంగతి సంబంధిత రుణ గ్రహీత అర్హతతోపాటు ఆస్తి విలువను బట్టి ఆధార పడి ఉంటుంది. టాప్ అప్ లోన్ గడువు సాధారణంగా 20 ఏండ్లు.. లేదా ఒరిజినల్ హోంలోన్ గడువుతో సమానంగా ఉంటుంది.
పర్సనల్ లోన్, వెహికల్ లోన్ పేమెంట్లకు ఎటువంటి పన్ను రాయితీ ప్రయోజనాలు ఉండవు. అయితే, హోంలోన్ మీద ఇన్కం టాక్స్ మినహాయింపు క్లయిమ్ చేసుకోవచ్చు. ఇంటి రుణం అసలు చెల్లింపుపై ఆదాయం పన్ను చట్టంలోని 80సీ సెక్షన్ కింద ఏటా రూ.150 లక్షలు, సెక్షన్ 24బీ కింద రూ.2 లక్షలు, మొత్తం ఇంటి రుణం చెల్లింపులపై ఏటా గరిష్టంగా రూ.3.50 లక్షల వరకు ఐటీ మినహాయింపు కోసం క్లయిమ్ చేయొచ్చు. కనుక ఇంటి రుణంపై దీర్ఘకాలికంగా ఎంతో పన్ను ఆదా చేసుకునే వీలు ఉంటుంది.
హోంలోన్ తోపాటు పర్సనల్ లోన్, కారు లేదా బైక్ లోన్ తీసుకున్న వారు ముందుగా పర్సనల్ లోన్.. అటుపై వెహికల్ లోన్.. చివరిగా ఇంటి రుణం చెల్లింపులకు ప్రియారిటీ ఇస్తే వెసులుబాటుగా ఉంటుంది. హోంలోన్ ఈఎంఐలను సంబంధిత బ్యాంకు అధికారులతో మాట్లాడి అడ్జస్ట్ చేసుకోవచ్చు. అలా అడ్జస్ట్ చేసుకున్న నెలవారీ ఈఎంఐ చెల్లింపుల్లో ఎక్కువ మొత్తం పర్సనల్ లోన్, వెహికల్ లోన్ తీర్చడానికే ఉపయోగించడం బెటర్ అని ఆర్థికవేత్తలు సూచిస్తున్నారు.