Moonlight `IT` Lens | వేతన జీవులకు మూన్‌లైటింగ్‌ ‘షాక్’లు

Moonlight `IT` Lens | ఒక కార్పొరేట్ కంపెనీలో పని చేస్తున్న ఎగ్జిక్యూటివ్ లు రహస్యంగా మరో కంపెనీకి పని చేయడమే మూన్ లైటింగ్.. అలా పని చేసి సంపాదించిన ఆదాయం వివరాలు తమ ఐటీ రిటర్న్స్ లో పేర్కొనలేదు. ఈ విషయాన్ని గుర్తించిన ఐటీ విభాగం అధికారులు.. వారికి నోటీసులు జారీ చేసినట్లు సమాచారం.

న్యూఢిల్లీ, ఆగస్టు 8: ఒక సంస్థలో ఉద్యోగిగా కొనసాగుతూనే గుట్టుగా మరో సంస్థకు సేవలు అందించడం (మూన్‌లైటింగ్‌) ద్వారా సాధారణ వేతనం కంటే అధిక ఆదాయాన్ని ఆర్జించి ఆ మొత్తాన్ని పన్ను రిటర్నుల్లో చూపని ఉద్యోగులకు ఆదాయ పన్ను (ఐటీ) శాఖ నోటీసులు పంపుతున్నది. వార్షిక సగటు అప్రకటిత ఆదాయం రూ.5 లక్షల నుంచి రూ.10 లక్షల వరకు ఉన్నవారికి తొలి విడతలో ఈ నోటీసులను పంపుతున్నట్టు ఐటీ అధికారులు వెల్లడించారు.

ఇలా 2019-20, 2020-21 ఆర్థిక సంవత్సరాలకు సంబంధించి ఇప్పటివరకు 1,100 మందికిపైగా ఉద్యోగులకు నోటీసులు పంపినట్టు ఈ వ్యవహారంతో సంబంధమున్న వ్యక్తులు వెల్లడించారని ‘ఎకనమిక్‌ టైమ్స్‌’ పత్రిక పేర్కొన్నది. ఈ అప్రకటిత ఆదాయాలకు సంబంధించిన చెల్లింపులన్నీ ఆన్‌లైన్‌ ద్వారా, విదేశీ ఖాతాల ద్వారా జరిగాయని ఐటీ శాఖ గుర్తించినట్టు తెలిపింది.

ఐటీ, అకౌంటింగ్‌, మేనేజ్‌మెంట్‌ రంగాలకు చెందిన అనేక మంది ఉద్యోగులు రెండు లేదా అంతకంటే ఎక్కువ కంపెనీల నుంచి నెలకోసారి లేదా మూడు నెలలకోసారి ఈ చెల్లింపులను పొందుతున్నారని, కానీ వారంతా ఈ అదనపు ఆదాయాన్ని పన్ను రిటర్నుల్లో చూపకుండా కేవలం ఫుల్‌టైమ్‌ ఉద్యోగం ద్వారా వచ్చిన ఆదాయాన్ని మాత్రమే ప్రకటిస్తున్నట్టు గుర్తించామని ఓ సీనియర్‌ అధికారి చెప్పినట్టు ఆ పత్రిక తెలిపింది.