Maruti Suzuki Grand Vitara | దేశంలోకెల్లా అతిపెద్ద కార్ల తయారీ సంస్థ మారుతి సుజుకి.. తన ఎస్యూవీ 5-డోర్ గ్రాండ్ విటారాపై భారీ ఆఫర్లు అందిస్తున్నది. హైబ్రీడ్ వేరియంట్ గ్రాండ్ విటారా మోడల్ కార్ల కొనుగోలుపై ఈ నెలాఖరు వరకూ రూ.87 వేల వరకూ రాయితీలు అందిస్తున్నది. 2023 స్టాక్ నిల్వల ప్రకారం రూ.1.02 లక్షల వరకూ రాయితీలు లభిస్తాయి.
హ్యుండాయ్ క్రెటా, కియా సెల్టోస్, టయోటా అర్బన్ క్రూయిజర్ హైరైడర్, హోండా ఎలివేట్, ఫోక్స్వ్యాగన్ టైగూన్, ఎంజీ ఆస్టర్ కార్లకు మారుతి సుజుకి గ్రాండ్ విటారా పోటీ ఇవ్వనున్నది. గ్రాండ్ విటారా స్ట్రాంగ్ హైబ్రీడ్ వర్షన్ కార్లపై కన్జూమర్ డిస్కౌంట్ రూ.30 వేలు, ఎక్స్చేంజ్ బోనస్ రూ.50 వేలు, కార్పొరేట్ డిస్కౌంట్ రూ.7,000 అందిస్తున్నది. దీంతో గ్రాండ్ విటారా కొనుగోలుదారులు మొత్తం రూ.87 వేల డిస్కౌంట్ పొందొచ్చు. 2023 స్టాక్స్ ప్రకారం కొనుగోలుదారులకు రూ.45 వేలు, ఎక్స్చేంజ్ బోనస్ రూ.50 వేలు, కార్పొరేట్ డిస్కౌంట్ రూ.7,000 కలిపి మొత్తం రాయితీ రూ.1.02 లక్షలు లభిస్తుంది.
మారుతి సుజుకి మిడ్ సైజ్ ఎస్యూవీ కారు గ్రాండ్ విటారా హైబ్రీడ్ వర్షన్ 1.5 -లీటర్ల పెట్రోల్ ఇంజిన్ తో వస్తుంది. ఈ ఇంజిన్ గరిష్టంగా 92 పీఎస్ విద్యుత్, 122 ఎన్ఎం టార్క్ వెలువరిస్తుంది. ఎలక్ట్రిక్ మోటార్ గరిష్టంగా 80 పీఎస్ విద్యుత్, 141 ఎన్ఎం టార్క్ వెలువరిస్తుంది. హైబ్రీడ్ సిస్టమ్ గరిష్టంగా 116 పీఎస్ విద్యుత్ వెలువరిస్తుంది.
మారుతి సుజుకి గ్రాండ్ విటారా కారు లీటర్ పెట్రోల్పై 27.97 కి.మీ దూరం ప్రయాణిస్తుంది. హైబ్రీడ్ వర్షన్ కారు ట్యాంకులో 45 లీటర్ల సామర్థ్యం ఉంటుంది. ఒకసారి ట్యాంక్ నింపితే 1,258 కి.మీ దూరం ప్రయాణించవచ్చు. మారుతి సుజుకి స్ట్రాంగ్ హైబ్రీడ్ వర్షన్ కార్లు జెటా+, ఆల్ఫా + వేరియంట్లలో లభిస్తుంది.
జెటా + ధర రూ.18.33 లక్షలు
జెటా + డ్యుయల్ టోన్ రూ.18.59 లక్షలు
ఆల్ఫా + ధర 19.93 లక్షలు
ఆల్ఫా+ డ్యుయల్ టోన్ రూ.20.09 లక్షలు.