Honda Elevate | ప్రముఖ కార్ల తయారీ సంస్థ హోండా కార్స్ కొత్తగా మార్కెట్లో విడుదల చేసిన మిడ్ సైజ్ ఎస్యూవీ కారు ఎలివేట్ డెలివరీ చేసింది. హైదరాబాద్లో శనివారం 100 మంది కస్టమర్లకు ఎలివేట్ కార్లను డెలివరీ చేసింది. దేశంలోని ప్రధాన నగరాల్లో మున్ముందు మెగా డెలివరీ ఈవెంట్ నిర్వహిస్తామని హోండా కార్స్ సేల్స్ అండ్ మార్కెటింగ్ డైరెక్టర్ యుయిచి మురతా చెప్పారు.
తమ కస్టమర్లకు ఎలివేట్ ఎస్యూవీ కార్లు డెలివరీ చేస్తున్నందుకు సంతోషిస్తున్నట్లు యుయిచి మురతా చెప్పారు. ఎలివేట్ రాకతో ఎస్యూవీ సెగ్మెంట్లో హోండా కార్స్ శక్తిమంతంగా దూసుకెళ్తుందన్నారు. తమ హోండా ఎలివేట్ వినియోగదారులందరినీ స్వాగతిస్తున్నట్లు తెలిపారు. ఈ కారు ధర రూ.10,99,900 నుంచి రూ.15,99,900 (ఎక్స్ షోరూమ్) మధ్య పలుకుతుంది.
హోండా ఎలివేట్ `అర్భన్ ఫ్రీ స్టయిలర్` కాన్సెప్ట్తో రూపుదిద్దుకున్నది. 6-స్పీడ్ మాన్యువల్ ట్రాన్స్మిషన్, 7-స్పీడ్ సీవీటీ ఆటోమేటిక్ ట్రాన్స్మిషన్ ఆప్షన్లలో అందుబాటులో ఉంది. శక్తిమంతమైన 1.5 లీటర్ల ఐ-వీటెక్ పెట్రోల్ ఇంజిన్తో వస్తున్నది. సేఫ్టీ కోసం అడాస్ ఫీచర్లతోపాటు సౌకర్యవంతమైన ప్రయాణాన్ని అందిస్తుంది. నాలుగు గ్రేడ్లు, పది కలర్ కాంబినేషన్లలో అందుబాటులో ఉంది.