GST Council | ఆన్‌లైన్‌ గేమింగ్‌పై 28% జీఎస్టీ.. క్యాసినోలు, గుర్రపు పందేలపై కూడా!

GST Council | ఆన్‌లైన్‌ గేమింగ్‌, క్యాసినోలు, హార్స్‌ రేసింగ్‌లపై గరిష్ఠంగా 28 శాతం పన్ను వేయాలని వస్తు, సేవల పన్ను (జీఎస్టీ) మండలి నిర్ణయించింది. మంగళవారం ఇక్కడ కేంద్ర ఆర్థిక శాఖ మంత్రి నిర్మలా సీతారామన్‌ నేతృత్వంలో 50వ జీఎస్టీ కౌన్సిల్‌ సమావేశం జరిగింది.

GST Council | న్యూఢిల్లీ, జూలై 11: ఆన్‌లైన్‌ గేమింగ్‌, క్యాసినోలు, హార్స్‌ రేసింగ్‌లపై గరిష్ఠంగా 28 శాతం పన్ను వేయాలని వస్తు, సేవల పన్ను (జీఎస్టీ) మండలి నిర్ణయించింది. మంగళవారం ఇక్కడ కేంద్ర ఆర్థిక శాఖ మంత్రి నిర్మలా సీతారామన్‌ నేతృత్వంలో 50వ జీఎస్టీ కౌన్సిల్‌ సమావేశం జరిగింది. ఆయా రాష్ర్టాల మంత్రులతోపాటు కేంద్రపాలిత ప్రాంతాల నుంచి ప్రతినిధులూ హాజరయ్యారు. ఈ క్రమంలోనే ఆన్‌లైన్‌ గేమింగ్‌, క్యాసినోలు, హార్స్‌ రేసింగ్‌లపై పన్ను ఎంతన్నదానిపై ఎప్పట్నుంచో పరిశీలిస్తున్న మంత్రుల బృందం సిఫార్సుల ఆధారంగా ఈ 28 శాతం పన్నును నిర్ణయించినట్టు భేటీ అనంతరం విలేఖరులతో మాట్లాడుతూ నిర్మలా సీతారామన్‌ తెలిపారు.

నిజానికి బెట్టింగ్‌ ముఖ విలువపై పన్ను వేయాలా? లేదా గేమింగ్‌ స్థూల రెవిన్యూపై విధించాలా? లేకపోతే ప్లాట్‌ఫామ్‌ ఫీజులపై మాత్రమే వర్తింపజేయాలా అన్నదానిపై మంత్రుల బృందం తర్జనభర్జనపడ్డట్టు మంత్రి తెలియజేశారు. ఈ నేపథ్యంలోనే మొత్తం వాల్యూపై పన్ను వేయాలని నిర్ణయించినట్టు చెప్పారు. ఆన్‌లైన్‌ గేమింగ్‌ సంస్థల టర్నోవర్‌, బెట్టింగ్‌ పూర్తి ముఖ విలువ, ఆట కోసం చేసే చెల్లింపులు ఇలా అన్నింటికీ పన్ను వర్తిస్తుందని వివరించారు. అయితే ఈ నిర్ణ యం మా వ్యాపారాన్ని దెబ్బతీస్తుందని గేమిం గ్‌ కంపెనీలు ఆందోళన చెందుతున్నాయి.

• సినిమా హాల్స్‌లో తినుబండారాలు, పానీయాలపై సేవా పన్ను 5 శాతానికి తగ్గింపు.
• క్యాన్సర్‌, అరుదైన వ్యాధులను నయం చేయడానికి వినియోగించే మందులకు జీఎస్టీ నుంచి మినహాయింపు.
• ప్రైవేట్‌ ఆపరేటర్ల ద్వారా జరిగే శాటిలైట్‌ ప్రారంభ సేవలపై ఇక జీఎస్టీ ఉండదు.
• జీఎస్టీ రేటు కంటే సెస్సు ఎక్కువ వర్తించేలా ఎస్‌యూవీ నిర్వచనం సవరణ. వాహనం పొడుగు (4 మీటర్లు, ఆపై), ఇంజిన్‌ సామర్థ్యం (1,500సీసీ, ఆపై), గ్రౌండ్‌ క్లియరెన్స్‌ (అన్‌లాడెడ్‌ క్లియరెన్స్‌ 170 ఎంఎం, ఆపై) ఆధారంగానే పన్ను.