ఈ-కామర్స్‌పై ఫ్రెషర్స్‌కు మోజెక్కువే

ఈ-కామర్స్‌ రంగంలో ఉద్యోగాలపై ఫ్రెషర్స్‌ అమితాసక్తిని ప్రదర్శిస్తున్నారు. ఆ తర్వాత బ్యాంకింగ్‌, ఫైనాన్స్‌ సర్వీసెస్‌, ఇన్సూరెన్స్‌ (బీఎఫ్‌ఎస్‌ఐ), టెలీకమ్యూనికేషన్స్‌, ఐటీ రంగాల్లో కొలువులను ఫ్రెషర్స్‌ ఇష్టపడుతున్నట్టు జాబ్‌, ప్రొఫెషనల్‌ నెట్‌వర్కింగ్‌ వేదిక అప్నా.కో చేపట్టిన సర్వే చెప్తున్నది.

• బీఎఫ్‌ఎస్‌ఐ, టెలికం రంగాలపైనా ఆసక్తి
• తాజా సర్వేలో వెల్లడి

న్యూఢిల్లీ, నవంబర్‌ 15: ఈ-కామర్స్‌ రంగంలో ఉద్యోగాలపై ఫ్రెషర్స్‌ అమితాసక్తిని ప్రదర్శిస్తున్నారు. ఆ తర్వాత బ్యాంకింగ్‌, ఫైనాన్స్‌ సర్వీసెస్‌, ఇన్సూరెన్స్‌ (బీఎఫ్‌ఎస్‌ఐ), టెలీకమ్యూనికేషన్స్‌, ఐటీ రంగాల్లో కొలువులను ఫ్రెషర్స్‌ ఇష్టపడుతున్నట్టు జాబ్‌, ప్రొఫెషనల్‌ నెట్‌వర్కింగ్‌ వేదిక అప్నా.కో చేపట్టిన సర్వే చెప్తున్నది. కెరియర్‌లో ఆకర్షణీయ, స్థిరమైన వృద్ధి అవకాశాలు, వృత్తి-వ్యక్తిగత జీవితాల మధ్య సమన్వయం వంటి అంశాలను ప్రధానంగా పరిశీలిస్తూ ఆయా రంగాలపై కొత్తగా వచ్చే ఉద్యోగార్థులు దృష్టి పెడుతున్నట్టు అప్నా.కో స్పష్టం చేసింది.

ఏయే రంగాల్లో..
ఈ-కామర్స్‌ కంపెనీల్లో ఉద్యోగాలను అత్యధికంగా 22 శాతం ఫ్రెషర్స్‌ ప్రయత్నిస్తున్నారు. సంప్రదాయ మార్కెట్‌తో పోల్చితే ఆన్‌లైన్‌ మార్కెట్‌కు కొనుగోలుదారులు ఇస్తున్న ప్రాధాన్యత, డిమాండ్‌ దృష్ట్యానే మెజారిటీ ఫ్రెషర్స్‌ ఈ-కామర్స్‌ రంగం దిశగా వెళ్తున్నట్టు అప్నా.కో చెప్పింది. ఇక బీఎఫ్‌ఎస్‌ రంగంపై 18 శాతం ఫ్రెషర్లు, టెలీకమ్యూనికేషన్స్‌పై 13 శాతం, ఐటీ రంగంపై 5 శాతం మంది ఫ్రెషర్లు మక్కువ చూపుతున్నారు. ఈ రంగాల్లో ఆ మేరకు ఉద్యోగ దరఖాస్తులు పెరిగినట్టు అప్నా.కో తెలియజేసింది. కాగా, ఈ సర్వేలో దేశవ్యాప్తంగా ఆయా నగరాల్లోని 10వేలకుపైగా ఫ్రెషర్స్‌ పాల్గొని తమ అభిప్రాయాలను పంచుకున్నారు.

• సూరత్‌, జైపూర్‌, గ్వాలియర్‌, భోపాల్‌, ఇండోర్‌, లక్నో, కాన్పూర్‌ వంటి ద్వితీయ, తృతీయ శ్రేణి నగరాల్లో ఎక్కువమంది యువకులు ఈ-కామర్స్‌, బీఎఫ్‌ఎస్‌ఐ రంగాల్లో ఉద్యోగాలను ఆశిస్తున్నారు.
• కంపెనీల స్థిరత్వానికి ప్రాధాన్యతనిస్తున్న 34 శాతం మంది ఫ్రెషర్స్‌. బ్రాండ్‌, రెప్యుటేషన్‌ ఆధారంగా 22 శాతం మంది ఆయా సంస్థల్లో ఉద్యోగాలకు ప్రయత్నిస్తున్నారు.
• అమెజాన్‌, ఫ్లిప్‌కార్ట్‌, రిలయన్స్‌ జియోలకు క్యూ కడుతున్న ఫ్రెషర్లు.
• వృత్తిగత, వ్యక్తిగత జీవితాలు బ్యాలెన్స్‌ అయ్యేలా ప్రశాంతమైన వాతావరణంలో పనిచేయడానికి వీలున్న కంపెనీలను ఇష్టపడుతున్న 38 శాతం మంది.