ElonMusk Starlink | రూ.7,350ల‌కే స్టార్‌లింక్ క‌నెక్ష‌న్‌! ఆ టెల్కోల‌తో టైఅప్‌?!

ElonMusk Starlink | ఎల‌న్‌మ‌స్క్ స్టార్‌లింక్.. శాటిలైట్‌బ్రాడ్‌బాండ్ సేవ‌లందించ‌డానికి దేశీయ టెల్కోల‌తో స‌హ‌కార ఒప్పందాల‌కు ప్ర‌య‌త్నిస్తోంది

ElonMusk Starlink | దేశీయంగా శాటిలైట్‌ బ్రాడ్‌బ్యాండ్ రంగంలోకి అడుగిడాల‌ని టెస్లా సీఈవో ఎల‌న్‌మ‌స్క్ సార‌ధ్యంలోని స్పేస్ ఎక్స్ ప్ర‌ణాళిక‌లు రూపొందిస్తున్న‌ది. స్పేస్ ఎక్స్ శాటిలైట్ బ్రాడ్ బాండ్ సంస్థ స్టార్‌లింక్‌ ప్ర‌త్యేకించి గ్రామీణ ప్రాంతాల‌కు శాటిలైట్ బ్రాడ్‌బాండ్ సేవ‌ల‌పై దృష్టి పెట్టింది. ఇందుకోసం దేశీయ టెలికం సంస్థ‌ల స‌హ‌కారం తీసుకోవాల‌ని భావిస్తున్న‌ది.

టెలికం కంపెనీల‌తో స‌హ‌కార ఒప్పందాలు చేసుకోవ‌డానికి ప్ర‌ణాళికలు రూపొందించామ‌ని స్టార్‌లింక్ ఇండియా డైరెక్ట‌ర్ సంజ‌య్ భార్గ‌వ శుక్ర‌వారం పీటీఐ వార్తాసంస్థ‌కు చెప్పారు. తొలి ద‌శ‌లో 12 జిల్లాల‌కు బ్రాడ్‌బాండ్ సేవ‌ల‌ను విస్త‌రించాల‌ని స్టార్ లింక్ నిర్ణ‌యించుకున్న సంగ‌తి తెలిసిందే.

శాటిలైట్ బ్రాడ్‌బాండ్ సేవ‌లు విస్త‌రించాల్సిన జిల్లాల‌ను నీతి ఆయోగ్ గుర్తించింద‌ని సంజ‌య్ భార్గ‌వ తెలిపారు. ఇందుకోసం యూనివ‌ర్స‌ల్ స‌ర్వీస్ ఆబ్లిగేష‌న్ ఫండ్ (యూఎస్‌వోఎఫ్‌)తోపాటు వివిధ సంస్థ‌ల‌కు గ‌ల ఆస‌క్తిని ప‌రిశీలిస్తున్న‌ట్లు చెప్పారు. భార‌త్‌లో ఇప్ప‌టికే 5,000ల‌కు పైగా ప్రీ ఆర్డ‌ర్లు త‌మ‌కు వ‌చ్చాయ‌ని స్టార్‌లింక్ పేర్కొంది.

ఒక్కో క‌స్ట‌మ‌ర్ నుంచి 99 డాల‌ర్లు లేదా రూ.7,350 డిపాజిట్ తీసుకుంటామ‌ని స్టార్‌లింక్ తెలిపింది. సెక‌న్‌కు 50-150 మెగాబైట్స్ డేటా స్పీడ్‌తో ఇంట‌ర్నెట్ సేవ‌లు అందించ‌నున్న‌ది. ఇంత‌కుముందు 10 గ్రామీణ లోక్‌స‌భ స్థానాల‌కు స్టార్‌లింక్ ట‌ర్మిన‌ల్స్ ద్వారా 80 శాతం ఇంట‌ర్నెట్ స‌ర్వీసులు అందించాల‌ని ల‌క్ష్యంగా పెట్టుకున్న‌ట్లు స్టార్‌లింక్ తెలిపింది.