Ebay Layoffs | ఈ ఏడాది సైతం ప్రముఖ కంపెనీల్లో లేఆఫ్స్ కొనసాగుతున్నాయి. గతేడాది పెద్ద సంఖ్యలో టెక్ కంపెనీలు ఉద్యోగులకు ఉద్వాసన పలికాయి. గూగుల్, అమెజాన్, జిరాక్స్ సహా అనేక కంపెనీలు వేలాది మంది ఉద్యోగులను తొలగించాయి. తాజాగా ఈ జాబితాలో మరో కంపెనీ సైతం చేరింది. ప్రముఖ ఈ-కామర్స్ సంస్థ ఈబే. ఈ కంపెనీ దాదాపు వెయ్యి మంది ఉద్యోగులను తొలగించనున్నది.
ఈ మేరకు కంపెనీ పూర్తికాల శ్రామికశక్తిలో తొమ్మిది శాతం ఉంటుందని.. ఆదాయం కన్నా ఖర్చులు పెరుగుతున్న నేపథ్యంలో నిర్ణయం తీసుకోక తప్పలేదని కంపెనీ పేర్కొంది. తేలికగా తీసుకునే చర్య కాదని.. ఇది ఈ-బయ్యర్స్పై ప్రభావం చూపుతుందని తెలుసునని చెప్పింది. ఈబే కమ్యూనిటీ, సంస్కృతికి కీలకమైన సహకారాన్ని అందించిన వ్యక్తులకు తప్పక వీడ్కోలు పలకక తప్పడం లేదని.. ఇదేం అంత సులభం కాదని పేర్కొంది. ప్రస్తుత ఆర్థిక వ్యవస్థతో పాటు మార్కెట్ సవాళ్లతో కూడుకొని ఉన్నదని.. ఈ క్రమంలో వ్యయ పరిమితిపై దృష్టి పెట్టడం అవసరమని భావించామని కంపెనీ తెలిపింది.
వ్యూహానికి వ్యతిరేకంగా, లక్ష్యానికి దూరంగా వెళ్తున్నామని.. ఉద్యోగుల సంఖ్య, ఖర్చులు వ్యాపారం వృద్ధిని అధిగమించాయని.. దీన్ని పరిష్కరించేందుకు ఎండ్-టు-ఎండ్ అనుభవాన్ని మెరుగుపరచడానికి, ప్రపంచవ్యాప్తంగా ఉన్న మా వినియోగదారుల అవసరాలను తీర్చేందుకు సంస్థాగత మార్పులను అమలు చేస్తున్నట్లు వివరించింది.