గృహోపకరణాల కొనుగోలులో జీరో కాస్ట్ ఈఎంఐ ఆఫర్లను చూస్తూనే ఉంటాం. వడ్డీలేని రుణంతో వస్తువులను కొనుగోలు చేసే సౌలభ్యం ఇందులో ఉంటుంది. దీంతో అంతా దీనికి ఎగబడిపోవడం సహజమే. కానీ ధరలోనే వడ్డీ మొత్తాన్ని కూడా కలిపేసి అమ్ముతారన్న నిజం తెలియదు. అసలుతో వడ్డీని కలిపి రుణ కాలపరిమితికి తగ్గట్టుగా ఈఎంఐలను నిర్ణయిస్తారు. అసలు జీరో వడ్డీ రుణాలే లేవని ఆర్బీఐనే చెప్పడం గమనార్హం. వడ్డీ మొత్తాన్ని కూడా ఉత్పత్తి ధరలో కలిపి అమ్మడమే జీరో కాస్ట్ ఈఎంఐ పథకాల జిమ్మిక్కు అని ఓ సర్క్యులర్లో స్పష్టం చేసింది.
ఉదాహరణకు ఒక ఉత్పత్తి ధర లక్ష రూపాయలు ఉందనుకుందాం. దీన్ని మీరు మొత్తం నగదు చెల్లించి కొనుగోలు చేస్తే డీలర్ డిస్కౌంట్ను ఆఫర్ చేస్తాడు. కానీ దాన్నే ఈఎంఐలో కొనుగోలు చేస్తే ఈ డిస్కౌంట్ ఉండదు. సదరు డిస్కౌంట్ మొత్తాన్ని వడ్డీకి సమానంగా ఉండేలా చూసుకుంటారు. అలాగే నో కాస్ట్ ఈఎంఐ నియమ నిబంధనలను చదువకుండా ఓ నిర్ణయానికి రాకండి. ప్రాసెసింగ్ ఫీజు, ప్రీ క్లోజర్ చార్జీలు, కాలపరిమితి ఇవన్నీ పరిశీలించండి. నో కాస్ట్ ఈఎంఐతో కొనుగోలు చేసే ముందు వివిధ డీలర్ల వద్ద ధరలను పోల్చి చూడండి. అలాగే నేరుగా నగదుతో కొనుగోలు చేయడానికి, ఈఎంఐలతో కొనుగోలు చేయడానికి మధ్య ఉన్న ధరల వ్యత్యాసాన్నీ పరిశీలించండి. ఆ తర్వాతే ఓ నిర్ణయానికి రండి.