కార్పొరేట్లూ జర భద్రం.. ఏఐ ఏజెంట్‌ ఘటనతో కేంద్రం హెచ్చరికలు

స్వయంప్రతిపత్తి కలిగిన కృత్రిమ మేధస్సు (ఏఐ) ఏజెంట్లకు సంబంధించి కంప్యూటర్‌ ఎమర్జన్సీ రెస్పాన్స్‌ టీమ్‌, ఇండియా (సీఈఆర్‌టీ-ఐఎన్‌) ఇచ్చిన కీలక హెచ్చరిక నేపథ్యంలో అన్ని కంపెనీలు తమ సైబర్‌ సెక్యూరిటీ వ్యవస్థల్ని బలోపేతం చేసుకోవాలని శుక్రవారం కేంద్ర ప్రభుత్వం సూచించింది.

న్యూఢిల్లీ, అక్టోబర్‌ 16 : స్వయంప్రతిపత్తి కలిగిన కృత్రిమ మేధస్సు (ఏఐ) ఏజెంట్లకు సంబంధించి కంప్యూటర్‌ ఎమర్జన్సీ రెస్పాన్స్‌ టీమ్‌, ఇండియా (సీఈఆర్‌టీ-ఐఎన్‌) ఇచ్చిన కీలక హెచ్చరిక నేపథ్యంలో అన్ని కంపెనీలు తమ సైబర్‌ సెక్యూరిటీ వ్యవస్థల్ని బలోపేతం చేసుకోవాలని శుక్రవారం కేంద్ర ప్రభుత్వం సూచించింది. కొన్ని భారతీయ సంస్థలపై ఏఐ ఏజెంట్లు సైబర్‌ దాడులకు పాల్పడ్డారంటూ సీఈఆర్‌టీ-ఐఎన్‌ గురువారం సంచలన ప్రకటన చేసింది.

అయితే సదరు ఏఐ ఏజెంట్ల పేర్లు, కంపెనీల వివరాలుగానీ తెలియపర్చలేదు. సంస్థాగత క్లౌడ్‌, వెబ్‌ ఆస్తుల బలహీనతల్ని అవకాశంగా తీసుకుని చాట్‌బాట్‌ మాదిరిగా కాకుండా స్వేచ్ఛగా పలు ఇన్‌స్ట్రక్షన్స్‌ ఇచ్చాయని సీఈఆర్‌టీ-ఇన్‌ తెలిపింది. ఈ క్రమంలోనే పెద్దగా ఎలాంటి ఆర్థిక నష్టం జరుగలేదంటూనే.. దీన్నో వార్నింగ్‌ బెల్‌గా కంపెనీలు పరిగణించాల్సిన అవసరం ఉందని కేంద్రం అప్రమత్తం చేసింది.