PAN-Aadhar Link | సీబీడీటీ కీలక ప్రకటన.. చలాన్ చెల్లిస్తే వెబ్ సైట్లో ఇలా పాన్-ఆధార్ అనుసంధానం..!

PAN-Aadhar Link | పాన్-ఆధార్ అనుసంధానానికి ఫైన్ చెల్లించిన వారు ఈ-చలాన్ డౌన్ లోడ్ చేసుకోకుండానే పాన్-ఆధార్ అనుసంధానం పూర్తి చేయవచ్చునని సీబీడీటీ తెలిపింది.

PAN-Aadhar Link |పాన్ కార్డు-ఆధార్ అనుసంధానానికి గడువు ముగియబోతున్న వేళ శుక్రవారం కేంద్ర ప్రత్యక్ష పన్నుల బోర్డు (సీబీడీటీ) కొన్ని గంటల ముంగిట కీలక ప్రకటన చేసింది. ఆధార్-పాన్ కార్డు అనుసంధానానికి 2023 జూన్ 30తో గడువు ముగుస్తున్న సంగతి తెలిసిందే.

ఆధార్-పాన్ కార్డు అనుసంధానానికి ఇప్పటికే ఫైన్ చెల్లించిన వారికి చలాన్ డౌన్ లోడ్ చేసుకోవడంలో ఇబ్బందులు ఎదురవుతున్నాయి. ఈ నేపథ్యంలో చలాన్ పేమెంట్ చేసిన తర్వాత ఆదాయం పన్ను విభాగం వెబ్ సైట్ లోకి వెళ్లి లాగిన్ కావాలని, ఈ-పే టాక్స్ సెక్షన్ లో పేమెంట్ పూర్తయిందా.. లేదా తెలుసుకోవచ్చునని ఆదాయం పన్ను విభాగం తన అధికారిక ట్విట్టర్ హ్యాండిల్ ద్వారా కేంద్ర ప్రత్యక్ష పన్నుల బోర్డు (సీబీడీటీ) తెలిపింది.

లావాదేవీలు పూర్తయినట్లు చూపితే పాన్-ఆధార్ అనుసంధానం పూర్తి చేసుకోవచ్చునని వెల్లడించింది. అందుకోసం చలాన్ డౌన్ లోడ్ చేసుకోవాల్సిన అవసరం లేదని స్పష్టం చేసింది. చలాన్ పేమెంట్ పూర్తయ్యాక పాన్ కార్డు హోల్డర్ల రిజిస్టర్డ్ ఈ-మెయిల్ కు రశీదు వస్తుంది. నగదు చెల్లింపు పూర్తయినా, ఆధార్-పాన్ కార్డు లింకింగ్ పూర్తి కాని దరఖాస్తులను పరిగణనలోకి తీసుకుంటామని వెల్లడించింది కేంద్ర ప్రత్యక్ష పన్నుల బోర్డు (సీబీడీటీ).