న్యూఢిల్లీ, అక్టోబర్ 26: ప్రభుత్వరంగ సంస్థ కెనరా బ్యాంక్ ఆర్థిక ఫలితాల్లో అంచనాలకుమించి రాణించింది. సెప్టెంబర్తో ముగిసిన మూడు నెలల కాలానికిగాను బ్యాంక్ రూ.3,606 కోట్ల నికర లాభాన్ని గడించింది. ఏడాది క్రితం ఇదే త్రైమాసికంలో నమోదైన రూ.2,525 కోట్ల లాభం కంటే ఇది 43 శాతం అధికం. వడ్డీల ద్వారా వచ్చే ఆదాయం పెరగడంతోపాటు కేటాయింపులు తగ్గుముఖం పట్టడం వల్లనే లాభాల్లో భారీ వృద్ధి నమోదైందని బ్యాంక్ వర్గాలు వెల్లడించాయి.
గత త్రైమాసికానికిగాను బ్యాంక్కు నికర వడ్డీ ఆదాయం ఏడాది ప్రాతిపదికన 19.76 శాతం ఎగబాకి రూ.8,903 కోట్లకు చేరుకున్నది. మొండి బకాయిల కోసం బ్యాంక్ కేటాయింపులు రూ.3,637 కోట్ల నుంచి రూ.2,608 కోట్లకు తగ్గినట్టు పేర్కొంది.
బ్యాంక్ స్థూల నిరర్థక ఆస్తుల విలువ 6.37 శాతం నుంచి 4.76 శాతానికి తగ్గగా, నికర ఎన్పీఏ1.41 శాతానికి పరిమితమైంది. బ్యాంక్ అంతర్జాతీయ వ్యాపారం 10 శాతం పెరిగి రూ.21,56,185 కోట్లకు చేరుకున్నది. గత నెల చివరినాటికి బ్యాంక్ 9,518 శాఖలు కలిగివున్నది. వీటిలో 3,059 శాఖలు గ్రామీణ ప్రాంతాల్లో ఉండగా, 1,895 శాఖలు అర్బన్ ప్రాంతాల్లో ఉన్నాయి.