Bank Working Hours | బ్యాంకింగ్‌లో వారానికి ఐదు రోజులే పని వేళలు.. బట్‌ తిరస్కరించిన ఐబీఏ

Bank Working Hours | బ్యాంకుల్లో ఐదు రోజుల పని విధానం తేవాలన్న ఉద్యోగ సంఘాల ప్రతిపాదనను ఇండియన్‌ బ్యాంక్స్‌ అసోసియేసన్‌ తిరస్కరించింది.

Bank Working Hours | బ్యాంకింగ్‌ రంగ ఉద్యోగులపై పనిభారం తగ్గించేందుకు వారానికి ఐదు రోజుల పని విధానాన్ని అమల్లోకి తేవాలని బ్యాంకు ఉద్యోగుల సంఘాలు ప్రతిపాదించాయి. ఐదు రోజుల వారం విధానం అమలు కోసం ప్రతి రోజు అదనంగా ఒక గంట విధులు నిర్వర్తించాలని ప్రతిపాదించాయి. దీని ప్రకారం ప్రతి రోజు ఉదయం 30 నిమిషాలు ముందుగా సేవలు ప్రారంభించాలని పేర్కొన్నాయి. ఇప్పుడు అమల్లో ఉన్న కస్టమర్‌ సర్వీస్‌ అవర్స్‌, నాన్‌ క్యాష్‌ ట్రాన్సాక్షన్‌ బ్యాంకింగ్‌ టైం మరో అర్థగంట పెంచాలని సూచించాయి.

ఈ ప్రతిపాదన ప్రకారం పని గంటలు ఉదయం 9.15 గంటల నుంచి సాయంత్రం 4.45 గంటలకు పెంచాలని బ్యాంకు ఉద్యోగ సంఘాలు ప్రతిపాదించాయి. క్యాష్‌ ట్రాన్సాక్షన్లను ఉదయం 9.30 గంటల నుంచి మధ్యాహ్నం 1.30 గంటల వరకు, మధ్యాహ్నం రెండు గంటల నుంచి 3.30 గంటల వరకు, నాన్‌-క్యాష్‌ ట్రాన్సాక్షన్‌ టైం 3.30 గంటల నుంచి 4.45 గంటలకు పెంచాలని సూచించాయి.

‘బ్యాంకుల్లో వారానికి ఐదు రోజుల పని విధానాన్ని ప్రవేశపెట్టాలని మేం డిమాండ్‌ చేస్తున్నాం. ఐబీఏ (ఇండియన్‌ బ్యాంక్స్‌ అసోసియేషన్‌) అందుకు అంగీకరించడం లేదు. గతేడాది భారతీయ జీవిత బీమా సంస్థ (ఎల్‌ఐసీ)లో ఈ విధానాన్ని ప్రవేశపెట్టారు. మళ్లీ ఈ ప్రతిపాదనను ఐబీఏ ముందు పెట్టాం. రెండు శనివారాలను సెలవు దినాలుగా ఎలా కాంపన్సేట్‌ చేయాలో మా వైఖరి, అభిప్రాయాలు తెలియజేయాలని ఐబీఏ కోరుతున్నది. ఐబీఐ ఆకాంక్షల మేరకు ప్రతి రోజూ 30 నిమిషాలు పని వేళలు పెంచడానికి మేం అంగీకరిస్తున్నాం. మా అభిప్రాయాలను, సూచనలను ఐబీఏ, కేంద్ర ప్రభుత్వం, ఆర్బీఐ అంగీకరిస్తాయని ఆశాభావంతో ఉన్నాం’ అని ఏఐబీఈఏ ప్రధాన కార్యదర్శి సీహెచ్‌ వెంకటాచలం పేర్కొన్నారు.

కరోనా మహమ్మారి వేళ వైరస్‌ సోకకుండా ఉండేందుకు వారానికి ఐదు రోజుల పని విధానాన్ని ప్రవేశ పెట్టాలని బ్యాంకు ఉద్యోగ సంఘాలు డిమాండ్‌ చేశాయి. కానీ, బ్యాంకు ఉద్యోగ సంఘాల ప్రతిపాదనను ఐబీఏ తిరస్కరించింది. అయితే, ఉద్యోగుల వేతనం 19 శాతం పెంచుతామని ఆఫర్‌ చేసింది ఐబీఏ. ప్రస్తుతం ప్రతి ఆదివారం, రెండో శనివారం, నాలుగో శనివారం బ్యాంకులకు సెలవు దినాలు.