అమెరికాలో మరో బ్యాంక్‌ మూసివేత

అమెరికాలో సిలికాన్‌ వ్యాలీ బ్యాంక్‌ సంక్షోభం ప్రపంచవ్యాప్తంగా ప్రకంపనలు సృష్టించిన కొద్ది వారాలకే మరో బ్యాంక్‌ మూతపడింది. తీవ్ర చిక్కుల్లో పడ్డ ఫస్ట్‌ రిపబ్లిక్‌ బ్యాంక్‌ను రెగ్యులేటర్లు మూసివేస్తున్నట్టు సోమవారం ప్రకటించారు.

న్యూయార్క్‌, మే 1: అమెరికాలో సిలికాన్‌ వ్యాలీ బ్యాంక్‌ సంక్షోభం ప్రపంచవ్యాప్తంగా ప్రకంపనలు సృష్టించిన కొద్ది వారాలకే మరో బ్యాంక్‌ మూతపడింది. తీవ్ర చిక్కుల్లో పడ్డ ఫస్ట్‌ రిపబ్లిక్‌ బ్యాంక్‌ను రెగ్యులేటర్లు మూసివేస్తున్నట్టు సోమవారం ప్రకటించారు. వెనువెంటనే ఆ బ్యాంక్‌ డిపాజిట్లన్నింటినీ, పలు రుణ ఆస్తుల్ని అమెరికాలో అతిపెద్ద బ్యాంక్‌ల్లో ఒకటైన జేపీ మోర్గాన్‌ ఛేజ్‌ బ్యాంక్‌కు విక్రయించారు.

రెండు నెలల్లో వరుస బ్యాంకింగ్‌ వైఫల్యాల్లో శాన్‌ఫ్రాన్సిస్కో కేంద్రంగా పనిచేస్తున్న ఫస్ట్‌ రిపబ్లిక్‌ బ్యాంక్‌ మూడవది. సిగ్నేచర్‌ బ్యాంక్‌, సిలికాన్‌ వ్యాలీ బ్యాంక్‌లు మార్చి నెలలో వెంటవెంటనే పతనంకావడంతో డిపాజిట్‌దార్లలో ఆందోళన పెరిగి ఫస్ట్‌ రిపబ్లిక్‌ నుంచి భారీగా డిపాజిట్లు ఉపసంహరించుకున్నారు. యూఎస్‌లో పెద్ద బ్యాంక్‌ల్లో గత ఏడాది చివరినాటికి ఫస్ట్‌ రిపబ్లిక్‌ది 14 వ ర్యాంక్‌. 8 రాష్ర్టాల్లోని 84 ఫస్ట్‌ రిపబ్లిక్‌ బ్యాంక్‌ శాఖలు..జేపీ మోర్గాన్‌ ఛేజ్‌ బ్యాంక్‌ శాఖల్లా రీఓపెన్‌ అవుతాయని, డిపాజిటర్లు వారి డిపాజిట్లను ఉపయోగించుకోవచ్చని ఫెడరల్‌ డిపాజిట్‌ ఇన్సూరెన్స్‌ కార్పొరేషన్‌ తెలిపింది.