Amazon Layoffs | ప్రముఖ సంస్థల్లో గత కొన్ని రోజులుగా ఉద్యోగుల తొలగింపు ప్రక్రియ కొనసాగుతూనే ఉంది. ట్విట్టర్, మైక్రోసాఫ్ట్, మెటా, ఫేస్బుక్ వంటి దిగ్గజ సంస్థలు తమ ఉద్యోగుల్ని ఇంటికి పంపించేశాయి. ఆర్థిక మాంద్యం భయాలతో ఈ ఏడాది ఆరంభం నుంచి సుమారు 18 వేల మందికి పైగా ఉద్యోగుల్ని తొలగించిన అమెజాన్.. తాజాగా మరోసారి లేఆఫ్స్కు సిద్ధమైంది.
రెండో విడత ఉద్యోగుల తొలగింపును మార్చి నెలలోనే కంపెనీ సీఈవో యాండీ జెస్సీ (CEO Andy Jassy) ఒక ప్రకటనలో వెల్లడించారు. ప్రపంచ వ్యాప్తంగా 9 వేల మందిని తొలగిస్తున్నట్లు ప్రకటించారు. ‘రాబోయే రోజుల్లో మరింత అస్థిరత నెలకొనే అవకాశాలు ఉండటంతో కంపెనీపై ఆర్థిక భారం తగ్గించుకోవాలని భావిస్తున్నాం. అందులో భాగంగా మరికొంతమంది ఉద్యోగులను తొలగించాలని నిర్ణయించాం. వచ్చే నెలలో ఈ తొలగింపుల ప్రక్రియ ప్రారంభమవుతుంది. త్వరలోనే దీనిపై ఉద్యోగులకు సమాచారం అందిస్తాం’ అని జెస్సీ (Andy Jassy) చెప్పారు. అమెజాన్ రెండో విడత వార్షిక ప్రణాళిక ప్రక్రియ సమావేశం అనంతరం ఆయన ఈ ప్రకటన చేశారు.
కంపెనీ నిర్ణయంతో భారత్లో వివిధ విభాగాల్లో పనిచేస్తున్న సుమారు 500 మంది వరకు లేఆఫ్లకు గురవుతారని అంచనా. తొలగింపుకు గురవుతున్నవారిలో ఎక్కువ మంది వెబ్ సర్వీసెస్, హెచ్ఆర్, సహాయ విభాగానికి చెందిన వారు ఉన్నారు. మార్చి నెలలో 9 వేల మంది ఉద్యోగుల తొలగిస్తామని సంస్థ చేసిన ప్రకటనలో భాగంగానే ఇండియాలో ఉద్యోగులకు పింక్ స్లిప్లు అందిస్తున్నారు. ఇప్పటికే కొంత మంది ఉద్యోగులకు పింక్ స్లిప్లు అందించారని కంపెనీకి చెందిన ఒక ఉద్యోగి తెలిపారు.
తాజా లేఆఫ్స్ (Layoffs) తో ఈ సంవత్సరం ఇప్పటివరకు అమెజాన్ 27,000 మంది ఉద్యోగుల్ని ఇంటికి పంపించినట్టయింది. గతంలో తొలగించిన 18,000 మందిలో రిటైల్, డివైజెస్, నియామకాలు, మానవ వనరుల విభాగాలకు చెందినవారు ఉన్నారు.
Also Read..
Girls Molested: 18 మంది మైనర్ అమ్మాయిలను వేధించిన యూపీ టీచర్
DK Shivakumar: వెన్నుపోటు పొడువను.. బ్లాక్మెయిల్ చేయను: డీకే శివకుమార్
Nitin Gadkari | వచ్చే ఎన్నికల్లో పోస్టర్లు వేయించను.. నా సేవ చూసే ఓట్లేయాలి: గడ్కరీ