Tirumala | శ్రీవారి ఆలయంలో నాలుగురోజుల పాటు పలు ఆర్జిత సేవలు రద్దు

Tirumala | తిరుమల శ్రీవారి ఆలయంలో ఆగ‌స్టు 5 నుంచి 7వ తేదీ వరకు పవిత్రోత్సవాలు సందర్భంగా పలు ఆర్జిత సేవలను టీటీడీ రద్దు చేసింది.

తిరుమల : తిరుమల (Tirumala) శ్రీవారి ఆలయంలో ఆగ‌స్టు 5 నుంచి 7వ తేదీ వరకు పవిత్రోత్సవాల సందర్భంగా పలు ఆర్జిత సేవలను (Arjitha services) టీటీడీ (TTD ) రద్దు చేసింది. ఆగ‌స్టు 4న అంకురార్పణతో ఉత్సవాలు ప్రారంభమవుతాయని తెలిపింది.

ఏడాది పొడవునా ఆలయంలో జరిగే అర్చనలు, ఉత్సవాల్లో యాత్రికుల వల్ల , సిబ్బంది వల్లగానీ తెలియక కొన్ని దోషాలు జరుగుతుంటాయి. వీటివల్ల ఆలయ పవిత్రతకు ఎలాంటి లోపం రానీయకుండా ఆగమశాస్త్రం ప్రకారం పవిత్రోత్సవాలు నిర్వహించడం జరుగుతుందని ఆలయ అర్చకులు వెల్లడించారు.

ఉత్సవాల్లో భాగంగా మూడు రోజుల పాటు ఆల‌యంలోని సంపంగి ప్రాకారంలో ఉదయం 9 నుంచి 11 గంటల వరకు స్నపనతిరుమంజనం కార్యక్రమం ఉంటుందన్నారు. సాయంత్రం ప్రత్యేకంగా అలంకరించిన ఆభరణాలతో శ్రీదేవి, భూదేవి సమేత శ్రీమలయప్పస్వామివారు ఆల‌య నాలుగు మాడ వీధుల్లో విహ‌రించి భ‌క్తుల‌కు ద‌ర్శన‌మిస్తారని తెలిపారు.

ఆగ‌స్టు 5న పవిత్రాల ప్రతిష్ట, ఆగ‌స్టు 6న పవిత్ర సమర్పణ, ఆగస్టు 7న పూర్ణాహుతి  ఉంటుందన్నారు. ప‌విత్రోత్సవాల్లో ఆగ‌స్టు 4న అంకురార్పణ కార‌ణంగా సహస్రదీపాలంకార సేవను, 5న అష్టదళ పాద పద్మారాధన సేవ, ఆగస్టు 7న తిరుప్పావడ సేవతో పాటు ఆగ‌స్టు 5 నుంచి 7వ తేదీ వ‌ర‌కు కల్యాణోత్సవం, ఊంజల్‌సేవ, ఆర్జిత బ్రహ్మోత్సవం, సహస్రదీపాలంకార సేవలను రద్దు చేస్తున్నామని వివరించారు.