TTD | తిరుపతి లడ్డూ ధరలు తగ్గించాలని భక్తుల రిక్వెస్ట్‌.. టీటీడీ ఈవో రియాక్షన్‌ ఇదీ!

TTD | తిరుమలలో శ్రీవారి లడ్డూ ప్రసాదాల (Laddu Prasadam) ధరలను ఎట్టి పరిస్థితుల్లో తగ్గించేది లేదని టీటీడీ ఈవో ధర్మారెడ్డి అన్నారు.

తిరుమ‌ల‌ : తిరుమలలో శ్రీవారి లడ్డూ ప్రసాదాల (Laddu Prasadam) ధరలను ఎట్టి పరిస్థితుల్లో తగ్గించేది లేదని టీటీడీ ఈవో ధర్మారెడ్డి (EO Dharmareddy) అన్నారు. ల‌డ్డూ బ‌రువు, ప‌రిమాణం ఏ మాత్రం త‌గ్గలేదని, రేటు త‌గ్గించ‌డానికి అవ‌కాశం లేదని స్పష్టం చేశారు. తిరుమ‌ల అన్నమ‌య్య భవనంలో నిర్వహించిన డ‌య‌ల్ యువ‌ర్ ఈవో కార్యక్రమంలో భక్తులు అడిగిన ప్రశ్నలకు ఆయన సమాధానమిచ్చారు.

శ్రీవారిని ద‌ర్శించుకున్న ప్రతి భ‌క్తుడికి ఒక ఉచిత ల‌డ్డూ అందిస్తున్నామని, బ్రహ్మోత్సవాలు (Brahomottsavam) , వైకుంఠ‌ ఏకాద‌శి త‌దిత‌ర ప‌ర్వదినాల్లో త‌ప్ప‌, మిగిలిన స‌మ‌యంలో భ‌క్తులు కావాల‌సిన‌న్ని ల‌డ్డూలు పొంద‌వ‌చ్చని సూచించారు. యువకులైన శ్రీవారి సేవకులు క్యూ లైన్లు, శ్రీవారి ఆలయంలో భక్తులకు సేవలందించేందుకు ముందుకు రావాలని పిలుపునిచ్చారు.

తిరుమలలో భక్తులు సేవలందించేందుకు ప్రస్తుతం ఉన్న 65 సంవత్సరాల పరిమితిని 60 సంవత్సరాలకు కుదించాలని చేసిన సూచనను తిరస్కరిస్తూ 60 ఏళ్ల వారు సక్రమంగా సేవలందించగలరని పేర్కొన్నారు. ఏప్రిల్ 1వ తేదీ నుంచి ఆన్‌లైన్‌లో అడ్వాన్స్ బుకింగ్ ద్వారా ద‌ర్శనం, సేవా టికెట్లు పొందిన భ‌క్తుల‌కు వ‌స‌తి అందుబాటులోకి వ‌స్తుందని ఆయన వెల్లడించారు. 50 సంవ‌త్సరాల క్రితం నిర్మించిన సప్తగిరి విశ్రాంతి గృహాల‌ను ఆధునీక‌రిస్తామని చెప్పారు.