Visit:
అమరావతి : తాను అధికారంలోకి ఉండి ఉంటే పథకాలన్నీ ప్రజలకు అందేవని మాజీ ముఖ్యమంత్రి వైఎస్ జగన్ (YS Jagan ) అన్నారు. రైతులు సంతోషంగా ఉండేవారని , విద్యాదీవెన, వసతి దీవెన అంది పిల్లల తల్లుల్లో ఆనందం వెల్లివిరిసేదని పేర్కొన్నారు. విశాఖ స్థానిక సంస్థల ఎమ్మెల్సీ ఎన్నికల (MLC Elections) సందర్భంగా మంగళవారం అనకాపల్లి, చోడవరం , మాడుగుల నియోజకవర్గాలకు చెందిన ఎంపీటీసీలు (MPTC), జడ్పీటీసీ (ZPTC) లతో తాడేపల్లిలోని క్యాంపు కార్యాలయంలో సమావేశమయ్యారు.
ఈ సందర్భంగా ఆయన మాట్లాడుతూ జగన్ అధికారంలో ఉండి ఉంటే సకాలంలో షెడ్యూల్ ప్రకారం అన్ని వర్గాలకు పథకాలు అందేవని గుర్తు చేశారు. ప్రతి ఇంటికి మంచి చేశామని, చేసిన మంచి ఎక్కడికీ పోదని, వచ్చే ఎన్నికలు మనకు శ్రీరామరక్ష అని పేర్కొన్నారు. వైసీపీ (YCP) అధికారంలో లేకపోవడంతో ప్రభుత్వ పథకాలు పేదలకు అందడం లేదని ఆరోపించారు.
రాష్ట్రంలో శాంతి భద్రతలు క్షీణించాయని, రెడ్బుక్ పాలన నడుస్తోందని, కూటమి ప్రభుత్వం కక్ష సాధింపు చర్యలకు పాల్పడిందని ఆగ్రహం వ్యక్తం చేశారు. ఎవరికైనా , ఏ పార్టీకైనా కష్టాలు ఎల్లకాలం ఉండవు. చీకటి తరువాత వెలుగు ఉంటుందని వెల్లడించారు. చంద్రబాబు ప్రజలకు ఆశ చూపి గెలిచారని, అధికారంలోకి వచ్చిన తరువాత బాబు నైజం బయటపడిందని ఎద్దేవా చేశారు.
