AP Assembly | రేపటి నుంచి 12 రోజుల పాటు ఏపీ అసెంబ్లీ, మండలి సమావేశాలు.. బడ్జెట్‌ను ప్రవేశపెట్టనున్న ప్రభుత్వం

AP Assembly | ఆంధ్రప్రదేశ్ అసెంబ్లీ సమావేశాలు ఈనెల 11న ప్రారంభం కానున్నాయి. అదే రోజు ఉదయం 10గంటలకు రాష్ట్ర ప్రభుత్వం వార్షిక బడ్జెట్‌ను ప్రవేశపెట్టనుంది.

అమరావతి : ఆంధ్రప్రదేశ్ అసెంబ్లీ సమావేశాలు (AP Assembly ) ఈనెల 11న ప్రారంభం కానున్నాయి. అదే రోజు ఉదయం 10గంటలకు రాష్ట్ర ప్రభుత్వం వార్షిక బడ్జెట్‌ను (Annual Budget) ప్రవేశపెట్టనుంది. నాలుగు నెలల క్రితం ఏర్పడిన కూటమి ప్రభుత్వం మొదటిసారిగా పూర్తిస్థాయి బడ్జెట్‌ను ప్రవేశపెట్టనుంది.

ప్రస్తుత ఓట్-ఆన్-అకౌంట్ బడ్జెట్ నవంబర్ చివరితో ముగియనుండడంతో సమావేశాల తొలిరోజే సమగ్ర బడ్జెట్‌ను ప్రవేశపెట్టనున్నారు. ఈ సమావేశాలను ఈనెల 22 వ తేదీ వరకు నిర్వహించనున్నారు.

తొలిరోజు ఉదయమే రాష్ట్ర కేబినెట్‌ సమావేశమై బడ్జెట్‌కు ఆమోదం తెలిపిన తరువాత శాసన సభలో రాష్ట్ర ఆర్థికశాఖ మంత్రి పయ్యావుల కేశవ్‌ బడ్జెట్‌ను, వ్యవసాయంపై బడ్జెట్‌ను మంత్రి అచ్చెన్నాయుడు ప్రవేశపెట్టనున్నారు.

శాసన మండలిలో (Council ) ఆర్థికశాఖ బడ్జెట్‌పై మంత్రి కొల్లు రవీంద్ర, వ్యవసాయంపై మంత్రి నారాయణ వ్యవసాయ బడ్జెట్‌ను ప్రవేశపెట్టనున్నారు. అనంతరం సభా వాయిదా పడిన తరువాత బీఏసీ సమావేశం ఉంటుందని అధికారులు వెల్లడించారు.