అర్హులందరికీ రుణమాఫీ చేయాలి

అర్హులైన రైతులందరికీ ఎలాంటి ఇబ్బందులు కలిగించకుండా రుణమాఫీ అమలు చేయాలని బ్యాంకు అధికారులను కుమ్రం భీం ఆసిఫాబాద్‌ కలెక్టర్‌ వెంకటేశ్‌ ధోత్రే ఆదేశించారు. మంగళవారం ఆసిఫాబాద్‌ జిల్లా కేంద్రంలోని తెలంగాణ గ్రామీణ బ్యాంకును సందర్శించి రుణమాఫీ పథకం నిర్వహణ ప్రక్రియను పరిశీలించారు.

ఆసిఫాబాద్‌ అంబేదర్‌చౌక్‌, జూలై 23 : అర్హులైన రైతులందరికీ ఎలాంటి ఇబ్బందులు కలిగించకుండా రుణమాఫీ అమలు చేయాలని బ్యాంకు అధికారులను కుమ్రం భీం ఆసిఫాబాద్‌ కలెక్టర్‌ వెంకటేశ్‌ ధోత్రే ఆదేశించారు. మంగళవారం ఆసిఫాబాద్‌ జిల్లా కేంద్రంలోని తెలంగాణ గ్రామీణ బ్యాంకును సందర్శించి రుణమాఫీ పథకం నిర్వహణ ప్రక్రియను పరిశీలించారు. అక్కడికి వచ్చిన రైతులతో మాట్లాడారు. బ్యాంకు అధికారులను వివరాలు అడిగి తెలుసుకున్నారు. ఈ సందర్భంగా కలెక్టర్‌ మాట్లాడుతూ రుణమాఫీ పథకం అమలు మొదటి విడుతలో భాగంగా లక్ష రూపాయల లోపు రుణం రైతుల ఖాతాలలో నిధులు జమ చేయాలన్నారు. ఎలాంటి షరతులు విధించకుండా నిబంధనల మేరకు రుణ మొత్తాన్ని రైతులకు చెల్లించాలని ఆదేశించారు. రుణమాఫీ పథకాన్ని జిల్లాలో అర్హులైన రైతులందరికీ వర్తించే విధంగా రాష్ట్ర ప్రభుత్వం చర్యలు తీసుకుంటున్నదని తెలిపారు. ఈ కార్యక్రమంలో లీడ్‌ బ్యాంకు మేనేజర్‌ వీ జోషి, ఆసిఫాబాద్‌ తహసీల్దార్‌ దేశ్‌పాండే, బ్యాంకు మేనేజర్‌ సిబ్బంది, రైతులు పాల్గొన్నారు.