ఆశ్రమాల్లో చన్నీటి స్నానం

ఐటీడీఏ ఆశ్రమ పాఠశాలలతో పాటు కస్తూర్బా విద్యార్థులకు చన్నీటి స్నానాలు తప్పడం లేదు. ఆయా చోట్ల సోలార్‌ హీటర్లు ఏర్పాటు చేయగా, అవి పనిచేయకపోవడంతో చేతి పంపులు, నీటి ట్యాంకులను ఆశ్రయిస్తూ అష్టకష్టాలు పడుతున్నారు.

• గిరిజన పాఠశాలల్లో పనిచేయని సోలార్‌ హీటర్లు
• ఒక్కోచోట రూ. 3 లక్షలతో ఏర్పాటు
• చేతి పుంపులు, నీటి ట్యాంకుల వద్ద విద్యార్థుల అవస్థలు
• తీవ్రమైన చలితో అనారోగ్యం
• సమస్య పరిష్కరించాలని వేడుకోలు

ఐటీడీఏ ఆశ్రమ పాఠశాలలతో పాటు కస్తూర్బా విద్యార్థులకు చన్నీటి స్నానాలు తప్పడం లేదు. ఆయా చోట్ల సోలార్‌ హీటర్లు ఏర్పాటు చేయగా, అవి పనిచేయకపోవడంతో చేతి పంపులు, నీటి ట్యాంకులను ఆశ్రయిస్తూ అష్టకష్టాలు పడుతున్నారు. సకాలంలో తరగతులకు హాజరుకావాలనే ఉద్దేశంతో తప్పనిసరి పరిస్థితుల్లో తీవ్రమైన చలిలో స్నానాలు చేస్తూ అనారోగ్యం బారిన పడుతున్నారు. ఇకనైనా అధికారులు స్పందించి తమ సమస్యకు పరిష్కారం చూపాలని వేడుకుంటున్నారు.

– కుమ్రం భీం ఆసిఫాబాద్‌ (నమస్తే తెలంగాణ)/కెరమెరి, డిసెంబర్‌ 15

కుమ్రం భీం ఆసిఫాబాద్‌ (నమస్తే తెలంగాణ)/కెరమెరి, డిసెంబర్‌ 15 : ఉట్నూర్‌లో ఐటీడీఏ పరిధిలో 104 గిరిజన ఆశ్రమ పాఠశాలలు, కస్తూర్బా విద్యాలయాలు ఉన్నాయి. ఆయాచోట్ల ఇంటిగ్రేటెడ్‌ యాక్షన్‌ ప్లాన్‌ (ఐఏపీ) నిధులతో సోలార్‌ వాటర్‌ హీటర్లను ఏర్పాటు చేశారు. ఎలాంటి టెండర్లు లేకుండానే ఓ సంస్థకు ఆశ్రమాల్లో సోలార్‌ హీటర్లు ఏర్పాటు చేసే బాధ్యత అప్పగించారు. ఒక్కోచోట రూ. 3 లక్షలతో సోలార్‌ హీటర్‌ ఏర్పాటు చేశారు. అయితే నాసిరకమైన హీటర్లను ఏర్పాటు చేయడం వల్ల అవి ఒక్క రోజు కూడా పనిచేయలేదన్న ఆరోపణలున్నాయి.

సోలార్‌ వాటర్‌ హీటర్ల నిర్వహణపై అధికారుల పర్యవేక్షణ పూర్తిగా కొరవడింది. ఇంజినీరింగ్‌ అధికారులు కూడా పట్టించుకోకపోవడంతో ఫలితం లేకుండా పోయింది. దీంతో ఆయా చోట్ల చదువుతున్న విద్యార్థులు చేతి పంపుల వద్ద, నీటి ట్యాంకుల వద్ద చల్లని నీళ్లతో స్నానాలు చేస్తూ అనారోగ్యం బారిన పడుతున్నారు. ఇకనైనా సోలార్‌ హీటర్లను బాగు చేయించాలని తమ ఇబ్బందులు దూరం చేయాలని వారు కోరుతున్నారు.

మస్తు తిప్పలైతంది

మా స్కూల్‌లో వాటర్‌ హీటర్‌ పనిచేస్తలేదు. పొద్దుగాల లేచి చల్లని నీటితో స్నానం చేయాల్సి వస్తుంది. ఎండవచ్చినంక చేద్దామంటే అప్పటికే బడి టైమ్‌ అయిపోతంది. చలిలో తప్పని పరిస్థితుల్లో స్నానాలు చేయాల్సి వస్తోంది. మస్తు తిప్పలైతంది. సార్లు మా బాధను అర్థం చేసుకొని హీటర్‌ను మంచిగ చేయించాలి.

– కోట్రంగే అంకిత, 6వ తరగతి, కేజీబీవీ మోడి.

హీటర్‌ ఉండి లాభం లేదు

మా స్కూల్‌లో వాటర్‌ హీటర్‌ ఉండి లాభంలేకుంటైంది. ఇది వరకు మంచిగనే పని చేసింది. ఇప్పుడు పాడైంది. ఎండకాలం అంటే వెళ్లదీసినం. వానకాలం, చలికాలంల మస్తు తిప్పలైతంది. అంత పొద్దున లేచి స్నానం చేయాల్నంటే భయమైతంది. ఈ వారం నుంచైతే మరీ దారుణంగా చలి పెరిగింది. సార్లు మా గోస చూడాలే..

– కాత్లే పాండు, 7వ తరగతి, హట్టి ఆశ్రమ పాఠశాల