వేణు తొట్టెంపూడి గుర్తున్నాడా ?

వేణు తొట్టెంపూడి గుర్తున్నాడా ? అప్ప‌ట్లో త‌న‌దైన కామెడీతో ఫ్యామిలీ ఆడియ‌న్స్‌లో ఎంతో క్రేజ్ తెచ్చుకున్న ఈ హీరో స‌డెన్‌గా ఇండ‌స్ట్రీని వ‌దిలేశారు.

June 3, 2021 / 07:53 PM IST

వేణు తొట్టెంపూడి గుర్తున్నాడా ? అప్ప‌ట్లో త‌న‌దైన కామెడీతో ఫ్యామిలీ ఆడియ‌న్స్‌లో ఎంతో క్రేజ్ తెచ్చుకున్న ఈ హీరో స‌డెన్‌గా ఇండ‌స్ట్రీని వ‌దిలేశారు. 1999లో వ‌చ్చిన‌ స్వ‌యంవ‌రం సినిమాతో ఇండ‌స్ట్రీకి ఎంట్రీ ఇచ్చిన వేణు.. తొలి సినిమాతోనే నంది స్పెష‌ల్ జ్యూరీ అవార్డు అందుకున్నాడు.

ఆ త‌ర్వాత చిరున‌వ్వుతో, హ‌నుమాన్ జంక్ష‌న్‌, క‌ళ్యాణ రాముడు, పెళ్లాం ఊరెళితే, ఖుషీ ఖుషీగా.. ఇలా సుమారు 26 సినిమాల్లో న‌టించారు. వీటిలో దాదాపు 15 సినిమాలు విజ‌యం సాధించ‌డం విశేషం.

కెరీర్‌లో ఎక్కువ శాతం హిట్లే అందుకున్న వేణు తొట్టెంపూడి 2009లో వ‌చ్చిన గోపి గోపిక గోదావ‌రి సినిమా త‌ర్వాత బ్రేక్ తీసుకున్నాడు.

అప్ప‌టికే కెరీర్ డ‌ల్ కావ‌డంతో ఎన్టీఆర్‌, బోయ‌పాటి కాంబినేష‌న్‌లో 2012లో వ‌చ్చిన దమ్ము సినిమాలో క్యారెక్ట‌ర్ ఆర్టిస్ట్‌గా న‌టించాడు. కానీ ఆ సినిమా పెద్ద‌గా ఆడ‌లేదు. ఆ త‌ర్వాత రామాచారి సినిమా చేసినా అది కూడా ప‌రాజ‌యం పాలైంది. అదే స‌మ‌యంలో వ్యాపార కార్య‌క‌లాపాల్లో బిజీ కావ‌డంతో సినిమాల‌కు పూర్తిగా దూర‌మ‌య్యాడు.

2013లో సినిమాల‌కు పూర్తిగా దూర‌మైన వేణు తొట్టెంపూడి.. గ‌త లోక్‌స‌భ‌ ఎన్నిక‌ల్లో ఆయ‌న బావ‌ నామా నాగేశ్వ‌ర‌రావు కోసం టీఆర్ఎస్ త‌ర‌ఫున ఖ‌మ్మం నియోజ‌క‌వ‌ర్గంలో ప్ర‌చారం కూడా నిర్వ‌హించారు.