ముఖంపై పెట్టినంత శ్రద్ధ చేతులపై పెట్టరు చాలామంది. ఎండ, వాన, చలి అన్నిటినీ భరిస్తాయి చేతులు. దీంతో చేతులు పొడిబారుతాయి. గరకుగా మారిపోతాయి. సమస్య తీవ్రమై పగుళ్లు కూడావస్తాయి. ఈ సమస్యకు చెక్ పెట్టే మార్గాలు అనేకం..
గులాబీ, నిమ్మకాయ క్రీమ్
తాజా గులాబీ రేకులు, నిమ్మ తొక్కలు ఒక గాజు కూజాలో నిల్వ చేసుకోవాలి. వాటికి ఓ కప్పు ఆలివ్నూనె జత చేయాలి. వారం రోజులపాటు ఆ మిశ్రమాన్ని చల్లని ప్రదేశంలో ఉంచాలి. ఆ తర్వాత నూనెను వడపోయాలి. రాత్రి పడుకునే ముందు పగిలిన చేతులపై మసాజ్ చేసుకుంటే.. చర్మం మృదువుగా తయారవుతుంది.
బేకింగ్ సోడా, కొబ్బరినూనె
మృత కణాలు చర్మాన్ని నిర్జీవంగా, నల్లగా మార్చేస్తాయి. ఆ కణాలను తొలగించడానికి బేకింగ్ సోడాలోని ప్రత్యేక గుణాలు సహాయపడతాయి. కొబ్బరినూనె చర్మానికి లోతైన పోషణ, తేమను అందించడంలో సాయపడుతుంది. ఒక గిన్నెలో ఒక కప్పు బేకింగ్ సోడా, అరకప్పు కొబ్బరినూనె కలిపి వేడి చేయాలి. ఆ తర్వాత 30 సెకన్లపాటు చేతిపై రుద్దుకోవాలి. పది నిమిషాల తర్వాత గోరువెచ్చని నీటితో కడిగేసుకుంటే.. త్వరలోనే సమస్య పరిష్కారం అవుతుంది.
కాఫీ, గ్రేప్సీడ్ ఆయిల్
కాఫీ.. చర్మం మీది మృత కణాలను తొలగించడంతో పాటు, చర్మాన్ని కాంతిమంతంగా మారుస్తుంది. గ్రేప్సీడ్ ఆయిల్ చర్మాన్ని మృదువుగా చేస్తుంది. ఒక గిన్నెలో 3 టేబుల్ స్పూన్ల కాఫీ పొడి, 1 టేబుల్ స్పూన్ ద్రాక్ష నూనె కలపాలి. దాన్ని పగిలిన చేతులకు మూడు నిమిషాలపాటు సున్నితంగా మసాజ్ చేయాలి. 20 నిమిషాల తర్వాత చల్లటి నీటితో కడిగేయాలి.
సముద్రపు ఉప్పు, జొజొబా
పొడిబారిన, పగిలిన చర్మంపై ఉపయోగించడానికి సముద్రపు ఉప్పు ఉత్తమమైంది. ఇది చర్మ సమస్యలను నయం చేస్తుంది. ఓ కప్పు ఉప్పు, ఓ కప్పు జొజొబా నూనె కలిపి చేతిపై సున్నితంగా మర్దన చేయాలి. 30 నిమిషాల తర్వాత గోరువెచ్చని నీటితో శుభ్రం చేసుకుంటే మృదుత్వం సొంతమవుతుంది.