కర్లీ కష్టాలకు చెక్‌

ఉంగరాల జుట్టు.. ముఖారవిందాన్ని రెట్టింపు చేస్తుంది. అదే సమయంలో లేనిపోని చికాకునూ కలిగిస్తుంది. వాస్తవానికి కర్లీ హెయిర్‌ పొడిగా ఉంటుంది. నిర్జీవంగా కనిపిస్తుంది. దీన్ని మెయింటెయిన్‌ చేయడం కూడా కొంచెం కష్టంగానే ఉంటుంది. అయితే, ఇలాంటి వారికి సౌందర్య నిపుణులు కొన్ని సలహాలు అందిస్తున్నారు.

ఉంగరాల జుట్టు.. ముఖారవిందాన్ని రెట్టింపు చేస్తుంది. అదే సమయంలో లేనిపోని చికాకునూ కలిగిస్తుంది. వాస్తవానికి కర్లీ హెయిర్‌ పొడిగా ఉంటుంది. నిర్జీవంగా కనిపిస్తుంది. దీన్ని మెయింటెయిన్‌ చేయడం కూడా కొంచెం కష్టంగానే ఉంటుంది. అయితే, ఇలాంటి వారికి సౌందర్య నిపుణులు కొన్ని సలహాలు అందిస్తున్నారు.

• రోజూ తలస్నానం చేస్తే.. జుట్టు మరింత పొడిబారుతుంది. కాబట్టి, కర్లీ హెయిర్‌ ఉన్నవారు వారానికి రెండుమూడు సార్లు తలస్నానం చేస్తే సరిపోతుంది. తక్కువ గాఢత కలిగిన షాంపూని.. నీళ్లలో కలుపుకొని వాడుకోవడం మంచిది. నీళ్లు కూడా మరీ వేడిగా కాకుండా.. గోరు వెచ్చగా ఉండేలా చూసుకోవాలి.
• ఉంగరాల జుట్టుకు తేమ చాలా అవసరం. కాబట్టి, తలస్నానం చేసిన ప్రతిసారీ కండిషనర్‌ తప్పనిసరిగా వాడాలి. అది కూడా, కురుల కుదుళ్లకు కాకుండా.. జుట్టు మొత్తానికీ కండీషనర్‌ రాసుకోవాలి. దాంతో, జుట్టు పొడిబారిపోకుండా ఉంటుంది.
• కర్లీ హెయిర్‌ ఉన్నవారు వారానికి మూడుసార్లు నూనె పెట్టుకోవాలట. కొబ్బరి నూనెను కుదుళ్లు, వెంట్రుకలకు అప్లయి చేసి, కాసేపు మర్దన చేసుకోవాలి. రాత్రివేళ నూనె పెట్టుకొని.. మరుసటి రోజు ఉదయాన్నే తలస్నానం చేస్తే జిడ్డు తొలగిపోతుంది.
• తడిగా ఉన్నప్పుడు దువ్వడం, టవల్‌తో గట్టిగా రుద్దుతూ తుడవడం జుట్టుకు ఏమాత్రం మంచిదికాదు. ఎందుకంటే, ఈ అలవాట్లు జుట్టు ఆరోగ్యాన్ని దెబ్బతీస్తాయి. అలాకాకుండా.. మెత్తటి వస్త్రంతో జుట్టును పొడిగా తుడుచుకోవాలి. పూర్తిగా ఆరిన తర్వాతే.. వెడల్పాటి పళ్లున్న దువ్వెనతో చిక్కులు తీసుకోవాలి. ఇక దువ్వెనకు బదులుగా.. వేళ్లతోనే జుట్టును సర్దుకోవడం మంచిది. దీనివల్ల రింగుల ఆకారం దెబ్బతినకుండా ఉంటుంది.
• ఉంగరాల జుట్టు తడిగా ఉన్నప్పుడు బిగుతుగా జడ వేసుకోవడం, గట్టిగా ముడేయడం చేయకూడదు. అలాచేస్తే జుట్టు చివర్లు చిట్లిపోతాయి. కాబట్టి, జుట్టును ముడేసే ముందు సహజసిద్ధంగా ఆరనివ్వడం మంచిది.
• హెయిర్‌ డ్రయర్‌ వాడుతుంటే.. ‘డిఫ్యూజర్‌’ అటాచ్మెంట్‌ తప్పకుండా వాడాలి. వేడిగాలి నేరుగా జుట్టుకు తగలకుండా ఇది కాపాడుతుంది.