Falooda Cake | పక్కా ఇండియన్‌ రెసిపీ ఇన్‌స్పిరేషన్‌తో ఫలూదా కేక్‌

Falooda Cake | ఫలూదా… హైదరాబాదీలు ఇష్టంగా తాగే వేసవి పానీయం. దీనిలో సేమియా, రోజ్‌ సిరప్‌, గుల్‌కంద్‌, రూహ్‌ ఆఫ్జా, సబ్జా గింజలు, డ్రైఫ్రూట్స్‌… ఇలా రకరకాల దినుసులు జోడిస్తారు. ఈ పక్కా ఇండియన్‌ రెసిపీ ఇన్‌స్పిరేషన్‌తో కేకులనూ తయారు చేశారు భారతదేశానికి చెందిన షబ్నమ్‌ రుసో ( Shabnam Russo ).

బ్రిటన్‌ రాణి ఎలిజబెత్‌ అధికార పీఠాన్ని అధిష్టించి 70 సంవత్సరాలు అయిన సందర్భంగా నిర్వహించిన పుడ్డింగ్‌ పోటీల కోసం దీన్ని రూపొందించారామె. ఈ పోటీలలో ప్రపంచవ్యాప్తంగా 5వేల మంది పాల్గొన్నారు. అందులో తొలి అయిదు స్థానాల్లో ఒకటిగా నిలిచిందీ ఫలూదా! ‘సమాజంలో భిన్న వర్గాల ప్రజలున్నట్లే, ఫలూదాలోనూ ఎన్నో రుచులు ఉంటాయి. అందుకే బ్రిటన్‌ సంస్కృతిలోని విభిన్న కోణాల్ని చూపించడానికి నేను కేక్‌ను ఓ మాధ్యమంగా తీసుకున్నాను. చీజ్‌ క్రీమ్‌తో పాటు గులాబీ రేకులు, రంగు, ఎడిబుల్‌ పువ్వులు, ఆకులతో దీన్ని తయారుచేశాను. ఇందుకు వారం రోజులు పట్టింది’ అని చెబుతారు షబ్నమ్‌. అంటే, మన కేకు లండన్‌లో కేక పెట్టిందన్నమాట!