జిల్లా కమిటీల ఆధ్వర్యంలో వైన్స్‌ లాటరీ

• ముందు గౌడ, ఎస్సీ, ఎస్టీ రిజర్వేషన్‌ డ్రా
• మిగిలిన షాపులకు తరువాత ఓపెన్‌ డ్రా
• మార్గదర్శకాలు విడుదల చేసిన రాష్ట్ర ప్రభుత్వం

హైదరాబాద్‌, నవంబర్‌ 7 (నమస్తే తెలంగాణ): మద్యం దుకాణాల కేటాయింపుల్లో రిజర్వేషన్ల అమలుకు రాష్ట్ర ప్రభుత్వం ఆదివారం మార్గదర్శకాలు విడుదల చేసింది. సీఎం కేసీఆర్‌ సూచనల మేరకు గౌడ్‌లకు 15%, ఎస్సీలకు 10%, ఎస్టీలకు 5% రిజర్వేషన్లు కల్పిస్తూ శనివారమే ఉత్తర్వులు జారీచేసిన ప్రభుత్వం.. తాజాగా ఏ4 లిక్కర్‌ షాప్‌ (వైన్స్‌)లకు రిజర్వేషన్ల ప్రకారం లాటరీతీసే బాధ్యతను కలెక్టర్ల ఆధ్వర్యంలోని జిల్లా ప్రొహిబిషన్‌ అండ్‌ ఎక్సైజ్‌ ఆఫీసర్‌, ట్రైబల్‌ డెవలప్‌మెంట్‌, బీసీ వెల్‌ఫేర్‌, ఎస్సీ డెవలప్‌మెంట్‌ అధికారులకు అప్పగించింది. ట్రైబల్‌ ఏరియాల్లోని షాపులను ఎస్టీలకు మాత్రమే కేటాయిస్తామని, ఇందుకోసం అన్ని షాపులతో కలిపి కాకుండా ప్రత్యేకంగా లాటరీ తీస్తామని పేర్కొన్నది. గిరిజనేతర ప్రాంతా ల్లో ఎస్టీలకు పరిమిత సంఖ్యలోనే షాపులు కేటాయిస్తామని స్పష్టం చేసింది. లాటరీతీసే సమయంలో తప్పనిసరిగా వీడియో రికార్డింగ్‌ చేయాలని సూచించింది.

లాటరీ తీసేది ఇలా..

• షాపుల గెజిట్‌ సీరియల్‌ నంబర్లతో కూడిన టోకెన్లను ఓ టేబుల్‌పై ఉంచుతారు.
• వీటినుంచి షెడ్యూల్‌ ఏరియాలోని షాపుల సీరియల్‌ నంబర్లు కలిగిన టోకెన్లను వేరుచేసి ప్రత్యేకంగా డ్రా తీస్తారు.
• మిగిలినవాటిని ఓ బాక్స్‌లో ఉంచి ఒక షాపు తరువాత మరోషాపుకు డ్రాతీస్తూ వెళ్తారు.
• ముందు ఒక టోకెన్‌ డ్రా ఎస్టీలకు, రెండో టోకెన్‌ డ్రా ఎస్సీలకు, మూడో టోకెన్‌ డ్రా గౌడ్‌లకు ఇలా ఓ క్రమ పద్ధతిలో డ్రా తీస్తారు.
• రిజర్వేషన్ల ప్రకారం షాపుల కేటాయింపు పూర్తయ్యాక, మిగిలిన షాపులకు ఓపెన్‌ డ్రా ఉంటుంది.
• ప్రక్రియ మొత్తం పూర్తయ్యాక ఈ మూడు క్యాటగిరీలకు
• కేటాయించిన షాపుల వివరాలను కలెక్టర్‌ విడుదల చేస్తారు.
• ఉదాహరణకు ఓ జిల్లాలో మొత్తం 34 షాపులుంటే వాటిలో 10 (ఎస్టీలకు 1, ఎస్సీలకు 5, గౌడ్‌లకు 4) షాపులు రిజర్వేషన్‌లో కేటాయిస్తారు. మిగిలిన 24 షాపులకు ఓపెన్‌ లాటరీ నిర్వహిస్తారు.