ఇంకెంత కాలం మభ్యపెడతరు?

స్సీ వర్గీకరణపై రేపు మాపు అంటూ పదేండ్లు కాలం గడిపి ఇంకా పార్లమెంటులో బిల్లు పెట్టకుండా ఇంకెంతకాలం మభ్యపెడతారని మాదిగ రిజర్వేషన్‌ పోరాట సమితి రాష్ట్ర అధ్యక్షుడు వంగపల్లి శ్రీనివాస్‌ మాదిగ కేంద్ర ప్రభుత్వాన్ని నిలదీశారు.

• ఎస్సీ వర్గీకరణపై కేంద్రాన్ని నిలదీసిన వంగపల్లి

హైదరాబాద్‌, జూలై 24 (నమస్తే తెలంగాణ): ఎస్సీ వర్గీకరణపై రేపు మాపు అంటూ పదేండ్లు కాలం గడిపి ఇంకా పార్లమెంటులో బిల్లు పెట్టకుండా ఇంకెంతకాలం మభ్యపెడతారని మాదిగ రిజర్వేషన్‌ పోరాట సమితి రాష్ట్ర అధ్యక్షుడు వంగపల్లి శ్రీనివాస్‌ మాదిగ కేంద్ర ప్రభుత్వాన్ని నిలదీశారు. హైదరాబాద్‌లోని ఎమ్మార్పీఎస్‌ రాష్ట్ర కార్యాలయంలో బుధవారం ఆయన మీడియాతో మాట్లాడుతూ.. ప్రతిపక్షంలో ఉన్నప్పుడు 100 రోజుల్లోనే వర్గీకరణ చేస్తామని హామీ ఇచ్చి, ఎన్నికల మ్యానిఫెస్టోలో పెట్టిన బీజేపీ నేతలు అధికారంలోకి వచ్చి 11 ఏండ్లు అవుతున్నా ఆ అంశాన్ని ప్రస్తావించడమే లేదని మండిపడ్డారు. నిన్నటి కేంద్ర బడ్జెట్‌లో కూడా తెలంగాణకు మొండి చేయిచూపారని విమర్శించారు. ప్రస్తుత పార్లమెంట్‌ సమావేశాల్లో ఎస్సీ వర్గీకరణ బిల్లు పెట్టకపోతే బీజేపీ నేతలతోపాటు మాదిగ సామాజికవర్గంలోని ఇంటి దొంగలను బట్టలిప్పి బజారున నిలబెడతామని హెచ్చరించారు. ఎస్సీ వర్గీకరణ అంశంపై తాడో పేడో తేల్చుకోవడానికి ఆగస్టు 6న ఢిల్లీలో దీక్ష చేయనున్నట్టు చెప్పారు. ఎస్సీ వర్గీకరణ కోరుకునే సంస్థలు, సంఘాలు, మద్దతు ఇచ్చే పార్టీలు తమ దీక్షకు సంఘీభావం తెలుపాలని కోరారు. సమావేశంలో ఎమ్మార్పీఎస్‌ నేత యాతాకుల భాసర్‌ మాదిగ, కోర్‌ కమిటీ సభ్యులు చిలకమరి గణేశ్‌, పొట్టపెంజర రమేశ్‌, బంగారు శ్రీనివాస్‌, డప్పు శివరాజ్‌, నకిరేకంటి అంజన్న, కొండ లక్ష్మమ్మ, ఈదునురి యాకయ్య, కొల్లూరి వెంకట్‌, వరిగడ్డి చందు, కే అంజన్న, ధర్మరపు శ్రీకాంత్‌, ఎల్‌ నాగరాజు తదితరులు పాల్గొన్నారు.