ప‌దో త‌ర‌గ‌తి ప‌రీక్ష‌ల‌పై తెలంగాణ ప్ర‌భుత్వం కీల‌క నిర్ణ‌యం

Tenth Exams | రాష్ట్రంలో ప‌దో త‌ర‌గ‌తి ప‌రీక్ష‌ల నిర్వ‌హ‌ణ‌పై తెలంగాణ ప్ర‌భుత్వం కీల‌క నిర్ణ‌యం తీసుకుంది. ఈ విద్యా సంవ‌త్స‌రం కూడా 11 పేప‌ర్ల‌కు బ‌దులుగా 6 పేప‌ర్లే నిర్వ‌హించాల‌ని విద్యాశాఖ ప్ర‌తిపాదించింది.

హైద‌రాబాద్ : రాష్ట్రంలో ప‌దో త‌ర‌గ‌తి ప‌రీక్ష‌ల నిర్వ‌హ‌ణ‌పై తెలంగాణ ప్ర‌భుత్వం కీల‌క నిర్ణ‌యం తీసుకుంది. ఈ విద్యా సంవ‌త్స‌రం కూడా 11 పేప‌ర్ల‌కు బ‌దులుగా 6 పేప‌ర్లే నిర్వ‌హించాల‌ని విద్యాశాఖ ప్ర‌తిపాదించింది. ఈ ప్ర‌తిపాద‌న‌ల‌కు రాష్ట్ర ప్ర‌భుత్వం ఆమోదం తెలిపింది.

క‌రోనా మ‌హ‌మ్మారి వ్యాప్తి కార‌ణంగా 2021లో 11 పేప‌ర్ల‌కు బ‌దులుగా 6 పేప‌ర్ల‌కు కుదిస్తూ ప్ర‌భుత్వం నిర్ణ‌యం తీసుకున్న సంగ‌తి తెలిసిందే. అయితే ఆ ఏడాది క‌రోనా ఉధృతి కార‌ణంగా ప‌రీక్ష‌లు నిర్వ‌హించ‌డం వీలు కాలేదు. ఇక 2022లో విద్యాశాఖ టెన్త్ ప‌రీక్ష‌లు నిర్వ‌హించింది. అప్పుడు 6 పేప‌ర్ల‌కు కుదించి ప‌రీక్ష‌లు నిర్వ‌హించారు. మ‌ళ్లీ తాజాగా 2023 లోనూ 6 పేపర్లకే పరీక్షలు నిర్వహించేందుకు అనుమతి ఇచ్చింది ప్ర‌భుత్వం.

గ‌తంలో తెలుగు, ఇంగ్లీష్‌, గ‌ణితం, సామాన్య శాస్త్రం, సాంఘిక శాస్త్రం స‌బ్జెక్టుల‌ను రెండు పేప‌ర్లుగా నిర్వ‌హించేవారు. ఇక హిందీ స‌బ్జెక్ట్‌కు ఒకే ప‌రీక్ష నిర్వ‌హించేవారు. కరోనా కార‌ణంగా 11 పేప‌ర్ల‌కు బ‌దులుగా 6 పేప‌ర్ల‌కే కుదించారు.