Visit:
వరంగల్‌, నవంబర్‌ 29 (నమస్తే తెలంగాణ ప్రతినిధి): కాళోజీ హెల్త్‌ యూనివర్సిటీ వీసీ డాక్టర్‌ నందకుమార్‌రెడ్డి ఆ పదవికి రాజీనామా చేసిన తెల్లారే తిరిగి విధులకు హాజరు కావడం రాష్ట్రంలో చర్చనీయాంశమైంది. అక్రమమార్గంలో విద్యార్థులను పాస్‌ చేశారని ఆరోపణలు రావడం, విజిలెన్స్‌ విచారణ కొనసాగుతున్న క్రమంలో నందకుమార్‌రెడ్డి వీసీ పదవికి రాజీనామా చేశారు. శుక్రవారం రాజీనామా చేసి శనివారం తిరిగి విధుల్లో చేరి, కొత్త వీసీ వచ్చే వరకు తననే ఆపద్ధర్మ వీసీగా కొనసాగమన్నారని మీడియాతో చెప్పారు. తాను ఏ తప్పుచేయలేదని, ఎటువంటి విచారణకైనా సిద్ధమేనని పేర్కొన్నారు.
ఒక పీజీ విద్యార్థిని సమాధాన పత్రాలను వాల్యుయేషన్‌ చేస్తున్న ప్రొఫెసర్‌ ఆ విద్యార్థి రాతను గుర్తించి, ఆ విద్యార్థికి ఫో న్‌చేసి ఫలానా ప్రశ్నకు సమాధానం ఎందు కు రాయలేదు అని ఆరా తీయగా ఆ విద్యా ర్థి ఫిర్యాదు చేశారు. నిబంధనల ప్రకారం తిరిగి వాల్యుయేషన్‌ చేయించామని వీసీ పేర్కొన్నారు. వాల్యూయేషన్‌ చేస్తున్న ప్రొ ఫెసర్‌ విద్యార్థి రాతను గుర్తించి సమాచా రం ఇవ్వడం ఏమిటి? వర్సిటీకి చెందిన ఇద్దరు ప్రొఫెసర్లు, ఒక ఎక్స్‌టర్నల్‌ వాల్యుయేటర్‌ ఉంటారు. విషయం తెలిశాక వా ల్యుయేటర్‌, పరీక్షల నియంత్రణా విభాగం పై ఎందుకు చర్యలు తీసుకోలేదు? అన్నీ తప్పులు తన పరిధిలోనే జరిగాయా? వాటి ఆధారాలు దొరకకుండా ఉండేందుకే ఆగమేఘాల మీద వీసీ వర్సిటీకి వచ్చారా? అనే అనుమానాలు వ్యక్తమవుతున్నాయి.
గాడిన పెట్టాల్సిన వారే గాడితప్పితే పరిస్థితులు ఎలా ఉంటాయో ఈ ఉదంతమే నిదర్శమని కాళోజీ వర్సిటీ వర్గాలు పేర్కొన్నారు. నందకుమార్‌రెడ్డి వర్సిటీ వీసీగా బాధ్యతలు చేపట్టినప్పటి (2025 మార్చి 19వ తేదీ) నుంచి వివాదాలకు వర్సిటీని కేంద్రబిందువుగా మార్చారనే చర్చసాగుతున్నది. వర్సిటీ ప్రధాన కేంద్రం (వరంగల్‌)లోని అవుట్‌సోర్సింగ్‌ సిబ్బందిని హైదరాబాద్‌ వర్సిటీ క్యాంపు కార్యాలయానికి బదిలీ చేశారు. 2025 అడ్మిషన్‌ సమయం లో లోకల్‌, నాన్‌ లోకల్‌ అంశంపై విద్యార్థుల తల్లిదండ్రులు కోర్టును ఆశ్రయించా రు. ఎన్‌ఆర్‌ఐ కోటాలో సీటు పొందిన ఓ విద్యార్థి విషయంలో సైతం వీసీ నిబంధనలు అతిక్రమించినట్టు ఆరోపణలు రాగా ప్రభుత్వం ఆగ్రహం వ్యక్తం చేయడంతో సీటు కేటాయించారు. నర్సింగ్‌ కళాశాలల తనిఖీల పేరుతో సైతం అక్రమాలకు పాల్పడినట్టు ఆరోపణలు ఉన్నాయి. వీసీగా బా ధ్యతలు స్వీకరించిన తరువాత తనచుట్టూ తనవర్గం ఉండాలని భావించారని, ప్రీతి ఘటన (గతంలో అనస్థీసియా విద్యార్థి మరణం)కు బాధ్యుడైన అధికారిని బదిలీ చేస్తే వీసీగా బాధ్యతలు స్వీకరించిన తరువాత ఆ వ్యక్తినే తీసుకొచ్చి వర్సిటీలో రిజిస్ట్రార్‌గా నియమించారనే ఆరోపణలు వ చ్చాయి. కరోనా సమయంలో వ్యాక్సిన్‌ను బయట ప్రైవేట్‌ దవాఖానలకు అమ్ముకున్నారని అప్పట్లో వార్తలొచ్చాయి.
తానే తప్పు చేయలేదని, ఎటువంటి విచారణకైనా సిద్ధమేనని ప్రకటించిన వీసీ.. హరీశ్‌రావుపై చేసిన వ్యాఖ్యలు పొలిటికల్‌ సర్కిల్‌లో చర్చనీయాంశమైంది. వర్సిటీలో అక్రమాలు జరుగుతున్నాయని వైద్య ఆరోగ్యశాఖ మాజీ మంత్రి హరీశ్‌రావు గవర్నర్‌, నేషనల్‌ మెడికల్‌ కౌన్సిల్‌కు ఎలా ఫిర్యాదు చేస్తారు? అని డాక్టర్‌ నందకుమార్‌రెడ్డి వ్యాఖ్యలు చేయడం వెనుక ప్రభుత్వ పెద్దల హస్తం ఉన్నట్టు అనుమానాలు.
వీసీ డాక్టర్‌ నందకుమార్‌రెడ్డి రాజీనామాపై వర్సిటీలో హర్షాతిరేకాలు వ్యక్తం అవుతున్నాయి. ‘రాజీనామా చేశానని చెప్పి.. మళ్లీ ఏం సర్దుకుపోయేందుకు వచ్చారు’ అని వర్సిటీలో గుసగుసలు వినిపిస్తున్నాయి. నందకుమార్‌రెడ్డి బాధితులు బహిరంగంగానే పటాకులు పేల్చి సంబురాలు చేసుకున్నారు. శనివారం యూనివర్సిటీ పరిపాలన భవనం ప్రధానగేట్‌ ముందు వీసీ కాఠిన్యం వేటుకు ఉద్యోగాలు కోల్పోయిన అవుట్‌సోర్సింగ్‌ సిబ్బంది పటాకులు పేల్చి హర్షాతిరేకాలు వ్యక్తం చేశారు. రాజీనామా చేసిన తెల్లారే తిరిగి విధులకు హాజరైన నందకుమార్‌రెడ్డి చర్యలు, చేష్టలు పలు అనుమానాలకు తావు ఇస్తుండటం గమనార్హం.
