థర్మల్‌ విద్యుత్తు ఢమాల్‌

రాష్ట్రంలో విద్యుత్తు కొరత తలెత్తకుండా చర్యలు చేపట్టాలని, థర్మల్‌ విద్యుత్తు రోజువారీ ఉత్పత్తిని 140 మిలియన్‌ యూనిట్లకు పెంచాలని ప్రభుత్వం నిర్దేశించిన లక్ష్యాన్ని జెన్‌కో చేరుకోలేకపోతున్నది. రోజుకు సగటున 100 మిలియన్‌ యూనిట్లు కూడా ఉత్పత్తి చేయలేకపోతున్నది.

• క్లిష్ట సమయంలో హఠాత్తుగా నిలిచిపోతున్న విద్యుత్తు ఉత్పత్తి
• లక్ష్యం 140 ఎంయూలు.. ఉత్పత్తి 100 ఎంయూలకే పరిమితం
• చేతులెత్తేస్తున్న జెన్‌కో ప్లాంట్లు.. క్రమంగా తగ్గుతున్న విద్యుత్తు లభ్యత

హైదరాబాద్‌, అక్టోబర్‌ 23 (నమస్తే తెలంగాణ) : రాష్ట్రంలో విద్యుత్తు కొరత తలెత్తకుండా చర్యలు చేపట్టాలని, థర్మల్‌ విద్యుత్తు రోజువారీ ఉత్పత్తిని 140 మిలియన్‌ యూనిట్లకు పెంచాలని ప్రభుత్వం నిర్దేశించిన లక్ష్యాన్ని జెన్‌కో చేరుకోలేకపోతున్నది. రోజుకు సగటున 100 మిలియన్‌ యూనిట్లు కూడా ఉత్పత్తి చేయలేకపోతున్నది. ఈ నెల 21న ఉత్పత్తి కేవలం 88.10 మిలియన్‌ యూనిట్లకే పరిమితమైంది. ఈ నెలలో ఇదే అత్యల్పం. ప్రస్తుతం రాష్ట్రంలో విద్యుత్తు డిమాండ్‌ అంతకంతకూ పెరుగుతున్నది. ఇలాంటి క్లిష్ట సమయంలో థర్మల్‌ ప్లాంట్లు అకస్మాత్తుగా షట్‌డౌన్‌ అవుతున్నాయి. ఇటీవల కాకతీయ థర్మల్‌ పవర్‌ ప్లాంట్‌లోని (కేటీపీపీ) యూనిట్‌-1 అర్ధాంతరంగా నిలిచిపోవడంతో 500 మోగావాట్ల విద్యుత్తు అందకుండా పోయింది. యాదాద్రి థర్మల్‌ పవర్‌ స్టేషన్‌ (వైటీపీఎస్‌)లోని యూనిట్‌-4లో 800 మెగావాట్ల విద్యుత్తు ఉత్పత్తికి ఆటంకమేర్పడింది. 270 మోగావాట్ల భద్రాద్రి థర్మల్‌ ప్లాంట్‌లోని యూనిట్‌-3 సెప్టెంబర్‌ 9 నుంచి మూతపడింది.

హై‘డల్‌’

ప్రాజెక్టుల్లో నీటి కొరత వల్ల రాష్ట్రంలో జలవిద్యుత్తు ఉత్పత్తి కూడా క్రమంగా తగ్గుతున్నది. ఈ నెల 14న జెన్‌కో 9.62 మిలియన్‌ యూనిట్ల హైడల్‌ విద్యుత్తును ట్రాన్స్‌కోకు సరఫరా చేసింది. ఈ నెలలో ఇదే గరిష్ఠం. ఈ తర్వాత నుంచి సరఫరా క్రమంగా తగ్గుతున్నది. 15న కేవలం 6.96 మిలియన్‌ యూనిట్లకే పరిమితమైన హైడల్‌ విద్యుత్తు ఉత్పత్తి.. 18న ఏకంగా 2.99 మిలియన్‌ యూనిట్లకు పడిపోయింది. ఈ నెలలో ఇదే అత్యల్పం. ఆ తర్వాత 20న జలవిద్యుత్తు ఉత్పత్తి 3.02 మిలియన్‌ యూనిట్లకు చేరింది. ప్రస్తుతం ప్రియదర్శిని జురాల (234 మెగావాట్లు), సింగూరు (15 మెగావాట్లు), పాలేరు మినీ (2 మెగావాట్లు), నాగార్జునసాగర్‌ లెఫ్ట్‌ కెనాల్‌ (60 మెగావాట్లు) జలవిద్యుత్తు కేంద్రాల్లో ఉత్పత్తి పూర్తిగా పడకేసింది.