Visit:
పెద్దపల్లి, నవంబర్‌ 29(నమస్తే తెలంగాణ) : కాంగ్రెస్‌ నాయకుల ఒత్తిడి, సుల్తానాబాద్‌ సీఐ వేధింపులతో తన భర్త ఆత్మహత్యకు యత్నించాడని ఓ బీఆర్‌ఎస్‌ నాయకుడి భార్య శనివారం ఓ వీడియో విడుదల చేయగా, వైరల్‌ అయింది. వీడియోలో తెలిపిన వివరాల ప్రకారం.. పెద్దపల్లి జిల్లా సుల్తానాబాద్‌ మండలం మియాపూర్‌కు చెందిన మాజీ సర్పంచ్‌ కొయ్యడ అరుణ్‌కుమార్‌ బీఆర్‌ఎస్‌లో నాయకుడిగా కొనసాగుతున్నాడు. భూముల పంపకాల విషయంలో అతడి తల్లి, తమ్ముడు అరుణ్‌కుమార్‌తో గొడవకు దిగుతున్నారు. ఈ విషయమై కోర్టును అశ్రయించి ఇంజక్షన్‌ అర్డర్‌ తీసుకొచ్చారు. కుటుంబీకులు అరుణ్‌ కుమార్‌పై సుల్తానాబాద్‌ పోలీస్‌ స్టేషన్‌లో ఫిర్యాదు చే శారు.
దీన్ని ఆసరాగా చేసుకొని కాంగ్రెస్‌ నాయకులు పోలీసులపై ఒత్తిడి పెంచి వేధింపులకు గురిచేశారని అరుణ్‌కుమార్‌ భార్య కొయ్యడ స్వప్న ఆరోపించింది. రాజకీయ కుట్రలో భాగంగా కాంగ్రెస్‌ నాయకుల ప్రోద్బలంతో సీఐ తన భర్తపై ఒత్తిడి చేయడంతో మనస్తాపం చెంది శుక్రవారం పురుగుల మందు తాగి ఆత్మహత్యకు యత్నించాడని, కరీంనగర్‌లోని దవాఖానలో చావు బతుకుల మధ్య కొట్టుమిట్లాడుతున్నాడని ఆవేదన వ్యక్తం చేసింది. తన భర్త ఆత్మ హత్యాయత్నానికి కారణమైన సుల్తానాబాద్‌ సీఐ, అత్త, మరిదిపై చర్యలు తీసుకోవాలని కోరింది.
