558 మంది రిలీవ్‌ ఆర్డర్లు రద్దు

వైద్యవిధాన పరిషత్‌ పరిధిలో పనిచేస్తున్న 558 మంది ఉద్యోగుల రిలీవ్‌ ఆర్డర్లను నిలిపివేస్తూ వైద్య ఆరోగ్యశాఖ ఉత్తర్వులు జారీచేసింది.

• వైద్యఆరోగ్యశాఖలో ‘నమస్తే’ కథనం కలకలం
• వైద్యవిధాన పరిషత్‌ ఉద్యోగుల్లో హర్షం

కరీంనగర్‌ విద్యానగర్‌, నవంబర్‌ 11: వైద్యవిధాన పరిషత్‌ పరిధిలో పనిచేస్తున్న 558 మంది ఉద్యోగుల రిలీవ్‌ ఆర్డర్లను నిలిపివేస్తూ వైద్య ఆరోగ్యశాఖ ఉత్తర్వులు జారీచేసింది. ‘రిలీవ్‌ చేశారు.. పోస్టింగులు మరిచారు’ అనే శీర్షికన ‘నమస్తే తెలంగాణ’లో బుధవారం ప్రచురితమైన కథనానికి వైద్యఆరోగ్యశాఖ స్పందించింది. వైద్య విద్యాసంచాలకులు (డీఎంఈ) రిలీవ్‌ ఉత్తర్వులను తాతాలికంగా నిలిపివేస్తూ సర్క్యులర్‌ జారీ చేశారు. డీఎంఈ, తెలంగాణ, కోఠి, హైదరాబాద్‌ నుంచి ఈ నెల 7న జారీచేసిన మోడిఫైడ్‌ ఆర్డర్స్‌లో భాగంగా వైటీవీవీపీకి బదిలీ చేయబడిన 558 మంది డాక్టర్లు, ఫార్మాసిస్టులు, ల్యాబ్‌ టెక్నీషియన్లు, నర్సింగ్‌, మినిస్టీరియల్‌, పారామెడికల్‌, నాలుగో తరగతి ఉద్యోగుల రిలీవ్‌ ఉత్తర్వులను తదుపరి ఆదేశాలు వచ్చే వరకు నిలిపివేస్తున్నట్టు స్పష్టం చేశారు.

అప్పటికే రిలీవ్‌ అయిన ఉద్యోగుల రిలీవ్‌ ఉత్తర్వులను రద్దు చేసి, వెంటనే వారు పనిచేస్తున్న పాత సంస్థలోనే తిరిగి చేరేలా చూడాలని అన్ని దవాఖానల సూపరింటెండెంట్లను ఆదేశించారు. వెంటనే కాంప్లెయిన్స్‌ రిపోర్ట్‌ పంపాలని పేర్కొన్నారు. డీఎంఈ సర్యులర్‌తో ఉద్యోగుల్లో హర్షం వ్యక్తమైంది. తమ పోస్టింగులు, విధుల నిర్వహణపై పూర్తి స్పష్టతతో కూడిన శాశ్వత ఉత్తర్వులు వెలువడేదాకా పాతచోటే కొనసాగుతామని తెలిపారు. తమ సమస్యను ప్రభుత్వం దృష్టికి తీసుకెళ్లిన ‘నమస్తే తెలంగాణ’కు కృతజ్ఞతలు తెలిపారు.