రాష్ట్రంలో పశ్చిమ గాలులు

• మూడ్రోజులు తేలికపాటి వర్షాలు

హైదరాబాద్‌, జూలై 25 (నమస్తే తెలంగాణ): రాష్ట్రంలోకి పశ్చిమ దిశ నుంచి గాలులు వీస్తున్నాయి. వీటి ప్రభావంతో సోమ, మంగళ, బుధవారాల్లో పలుచోట్ల తేలికపాటి నుంచి ఓ మోస్తరు వర్షాలు కురుస్తాయని హైదరాబాద్‌ వాతావరణ కేంద్రం తెలిపింది. ఈ నెల 28న ఉత్తర బంగాళాఖాతం పరిసరప్రాంతాల్లో అల్పపీడనం ఏర్పడే అవకాశం ఉన్నదని పేర్కొన్నది. గడిచిన 24 గంటల్లో మేడ్చల్‌ మల్కాజిగిరి, నల్లగొండ, సూర్యాపేట జిల్లాలు మినహా అన్ని జిల్లాల్లోని ఒకటి రెండుచోట్ల తేలికపాటి నుంచి ఓ మోస్తరు వర్షాలు కురిశాయి. అత్యధికంగా ఆదిలాబాద్‌ రూరల్‌ మండలం పిప్పల్‌ధరిలో 4.85 సెంటీమీటర్ల వర్షపాతం నమోదైంది. కుమ్రంభీం ఆసిఫాబాద్‌ జిల్లా రెబ్బెన మండలం వాంకులంలో 4.75 సెంటీమీటర్లు, ఆదిలాబాద్‌ పట్టణంలో 3.53 సెంటీమీటర్ల వర్షం కురిసింది. మరోవైపు, హైదరాబాద్‌లో అక్కడక్కడ చిరు జల్లులు కురిశాయి. రాబోవు రెండు, మూడ్రోజులు ఇదే వాతావరణం ఉంటుందని హైదరాబాద్‌ వాతావరణ శాఖ అధికారులు తెలిపారు.