Conductor Pravalika | కండక్టర్ ప్రవళిక తల్లికి ఉద్యోగం.. రూ.10లక్షల పరిహారం ప్రకటించిన పొన్నం.. ప్రయాణికురాలిపై హత్య కేసు!

Conductor Pravalika | మణుగూరు ఆర్టీసీ డిపో మహిళా కండక్టర్‌ గుండ్ల ప్రవళిక కుటుంబానికి మంత్రి పొన్నం ప్రభాకర్ రాష్ట్ర ప్రభుత్వం తరఫున రూ.10 లక్షల ఎక్స్‌గ్రేషియా ప్రకటించారు. అలాగే ప్రవళిక తల్లికి ప్రభుత్వ ఉద్యోగం, కుటుంబానికి ఇందిరమ్మ ఇల్లు మంజూరు చేయనున్నట్లు తెలిపారు.

Conductor Pravalika | ప్రయాణికురాలు నెట్టివేయడంతో ఆర్టీసీ బస్సు కిందపడి ప్రాణాలు కోల్పోయిన మణుగూరు ఆర్టీసీ డిపో మహిళా కండక్టర్‌ గుండ్ల ప్రవళిక కుటుంబానికి రాష్ట్ర ప్రభుత్వం అండగా ఉంటుందని రవాణా శాఖ మంత్రి పొన్నం ప్రభాకర్ తెలిపారు.. బాధిత కుటుంబానికి రాష్ట్ర ప్రభుత్వం తరఫున రూ.10 లక్షల ఎక్స్‌గ్రేషియా ప్రకటించారు. అలాగే ప్రవళిక తల్లికి ప్రభుత్వ ఉద్యోగం, కుటుంబానికి ఇందిరమ్మ ఇల్లు మంజూరు చేయనున్నట్లు తెలిపారు. ఇక ఆర్టీసీ తీసుకున్న నిర్ణయం కారణంగా బ్యాంకు తరఫు నుంచి మరో రూ. కోటి వరకు ప్రమాద బీమా అందుతుందని వెల్లడించారు.

హైదరాబాద్‌లోని ఉస్మానియా ఆసుపత్రి మార్చురీ వద్ద ప్రవళిక పార్థివదేహానికి మంత్రి పొన్నం ప్రభాకర్‌ నివాళులర్పించారు. అనంతరం ఆమె తల్లిని పరామర్శించి కుటుంబానికి ప్రభుత్వం, ఆర్టీసీ అండగా ఉంటాయని భరోసా ఇచ్చారు. ముఖ్యమంత్రి రేవంత్‌రెడ్డి ఆదేశాల మేరకు ప్రవళిక తల్లికి ఉద్యోగం, కుటుంబానికి ఇందిరమ్మ ఇల్లు మంజూరు చేస్తున్నట్లు తెలిపారు. ఆర్థిక సాయం అందించడంతోపాటు కుటుంబాన్ని అన్ని విధాలా ఆదుకుంటామని పేర్కొన్నారు.

 

మహిళా కండక్టర్ ప్రవళిక మృతికి కారణమైన ప్రయాణికురాలిపై హత్య కేసు నమోదు చేసి తగిన చర్యలు తీసుకుంటాం

ఆర్టీసీ సిబ్బంది పొరపాటు చేస్తే ఉన్నతాధికారులకు ఫిర్యాదు చేయండి.. అంతే తప్ప చట్టాన్ని మీ చేతుల్లోకి తీసుకోవద్దు

ఓ ప్రయాణికురాలు తోసెయ్యడం వల్ల.. మహిళా కండక్టర్ ప్రవళిక మృతి చెంది ఓ కుటుంబం రోడ్డున పడింది

ప్రవళిక కుటుంబానికి రూ.1 కోటి నష్టపరిహారంత పాటు ఒక ఇందిరమ్మ ఇల్లు, ఆమె తల్లికి ఉద్యోగం ఇస్తాం

– మంత్రి పొన్నం ప్రభాకర్

— PulseNewsBreaking (@pulsenewsbreak) November 4, 2026

ప్రయాణికురాలిపై హత్య కేసు

ఆర్టీసీ సిబ్బంది విధి నిర్వహణలో పొరపాటు చేస్తే ఉన్నతాధికారులకు ఫిర్యాదు చేయాలని, అంతేతప్ప చట్టాన్ని చేతుల్లోకి తీసుకోవద్దని పొన్నం ప్రభాకర్‌ సూచించారు. ఒక ప్రయాణికురాలు తోసేయడం వల్ల మహిళా కండక్టర్‌ ప్రాణాలు కోల్పోయి ఓ కుటుంబం రోడ్డున పడిందని పేర్కొన్నారు. ఇలాంటి ఘటనలు పునరావృతం కాకుండా బాధ్యులపై కఠిన చర్యలు తీసుకుంటామని స్పష్టం చేశారు. ప్రవళిక మృతికి కారణమైన ప్రయాణికురాలిపై హత్య కేసు నమోదు చేసి తగిన చర్యలు తీసుకుంటామని మంత్రి స్పష్టం చేశారు.