లేబర్‌ అసిస్టెంట్‌ కమిషనర్‌ పోస్టుల విభజనకు నోడల్‌ అధికారి

హైదరాబాద్‌, ఏప్రిల్‌ 30 (నమస్తే తెలంగాణ): కార్మికశాఖలోని అసిస్టెంట్‌ కమిషనర్‌ ఆఫ్‌ లేబర్‌ పోస్టుల విభజన ప్రక్రియ వేగవంతమైంది. విభజన కోసం తెలంగాణ ప్రభు త్వం ప్రత్యేకంగా నోడల్‌ అధికారిని నియమించింది. పునర్వ్యవస్థీకరణ పోర్టల్‌లో అసిస్టెంట్‌ కమిషన్‌ ఆఫ్‌ లేబర్‌ క్యాడర్‌ సామర్థ్య సమాచారాన్ని అప్‌లోడ్‌ చేయాలని తెలంగాణ అధికారులకు ఏపీ రీ-ఆర్గనైజేషన్‌ ముఖ్య కార్యదర్శి ఎల్‌ ప్రేమచంద్రారెడ్డి లేఖ రాశారు. పునర్వ్యవస్థీకరణ పోర్టల్‌లోని ఫారమ్‌-3లో అసిస్టెంట్‌ కమిషనర్‌ ఆఫ్‌ లేబర్‌ అధికారుల వివరాలు పుట్టిన తేదీ, సర్వీసులో చేరిన తేదీతో సహా పూర్తి వివరాలను అప్‌లోడ్‌ చేయాలని తెలంగాణ అధికారులను ఆయన కోరారు. ఇప్పటికే రెండు రాష్ర్టాల పరిధిలోకి వచ్చే 87 మంది అధికారుల జాబితాను ఏపీ రూపొందించింది. కాని వాస్తంగా కార్మికశాఖలో మొత్తం 106 అసిస్టెంట్‌ లేబర్‌ కమిషనర్లు ఉన్నారు. వీరిలో 19 మంది ప్రత్యక్ష నియమాకాల ద్వారా వచ్చారు. ఈ మేరకు పునర్వ్యవస్థీకరణ పోర్టల్‌లో ప్రత్యేక లాగిన్‌ను క్రియేట్‌ చేశారు. యూజర్‌ ఐడీలను ఇప్పటికే రెండు రాష్ర్టాల లేబర్‌ కమిషనర్లకు విడిగా కేటాయించారు. పోస్టులకు చెందిన క్యాడర్‌ స్ట్రెంత్‌ను అప్‌లోడ్‌ చేసేందుకు ఐడీ, పాస్‌వర్డ్‌ను నోడల్‌ అధికారులకు ఇచ్చారు.