Union Budget | హైదరాబాద్‌-బెంగళూరు పారిశ్రామిక కారిడార్‌ అభివృద్ధికి ప్రత్యేక నిధులు: కేంద్ర ఆర్థిక మంత్రి

ఆంధ్రప్రదేశ్‌ విభజన చట్టం ప్రకారం పారిశ్రామికాభివృద్ధికి ప్రత్యేక సహకారం అందిస్తామని కేంద్ర ఆర్థిక మంత్రి నిర్మలా సీతారామన్‌ (Nirmala Sitharaman) అన్నారు. ఇందులో భాగంగా హైదరాబాద్‌-బెంగళూరు ఇండస్ట్రియల్‌ కారిడార్‌లోని అభివృద్ధికి ప్రత్యేక నిధులు కేటాస్తామని చెప్పారు.

న్యూఢిల్లీ: ఆంధ్రప్రదేశ్‌ విభజన చట్టం ప్రకారం పారిశ్రామికాభివృద్ధికి ప్రత్యేక సహకారం అందిస్తామని కేంద్ర ఆర్థిక మంత్రి నిర్మలా సీతారామన్‌ (Nirmala Sitharaman) అన్నారు. ఇందులో భాగంగా హైదరాబాద్‌-బెంగళూరు ఇండస్ట్రియల్‌ కారిడార్‌లోని అభివృద్ధికి ప్రత్యేక నిధులు కేటాస్తామని చెప్పారు. అదేవిధంగా విశాఖ-చెన్నై పారిశ్రామిక కారిడార్‌లోని నోడ్‌లకు ప్రత్యేక సాయం అందిస్తామన్నారు. ఓర్వకల్లు, కొప్పర్తి ప్రారిశ్రామిక కేంద్రాలకు నీళ్లు, విద్యుత్‌, రోడ్లు హైవేల అభివృద్ధికి నిధులు కేటాయిస్తున్నామని వెల్లడించారు. అయితే ఆ మొత్తం ఎంతనే విషయాన్ని మంత్రి స్పష్టం చేయలేదు.

ఇక బడ్జెట్‌లో ఆంధ్రప్రదేశ్‌కు భారీగా ఆర్థిక సాయం ప్రకటించారు. రాజధాని అమరావతి అభివృద్ధికి రూ.15 వేల కోట్లు ప్రత్యేక సాయం అందిస్తామన్నారు. అవసరాన్ని బట్టి భవిష్యత్తులో అమరావతికి మరిన్ని అదనంగా నిధులు కేటాయిస్తామన్నారు. ఏపీ విభజన చట్టానికి అనుగుణంగా పోలవరం సత్వర నిర్మాణానికి సంపూర్ణ సాయం ఉంటుందన్నారు. పోలవరానికి కావాల్సిన నిధులు అందిస్తామని చెప్పారు. పోలవరం ఆంధ్రప్రదేశ్‌కు, రైతులకు జీవనాడి వంటిదన్నారు. అది భారత ఆహార భద్రతకు ఎంతో కీలకమైందని చెప్పారు.