తెలంగాణపై మేం సవతి తల్లి ప్రేమ చూపించడంలేదు.. రాష్ట్రాల వికాసమే దేశ వికాసం.. ఇప్పటికే ఎన్నో నిధులు ఇచ్చాం. తెలంగాణ అభివృద్ధి కావాలన్నదే మా ఆకాంక్ష.
– న్యూఢిల్లీలో తెలంగాణ అవతరణ దినోత్సవాల్లో కేంద్ర హోం మంత్రి అమిత్ షా
ప్రధానమంత్రి నరేంద్ర మోదీ ఆత్మ.. కేంద్ర హోం మంత్రి అమిత్షా ఈ ఏడాది తెలంగాణ ఆవిర్భావ దినోత్సవాల సందర్భంగా చేసిన వ్యాఖ్యలివి. తెలంగాణపై ఇంత ప్రేమ ఒలకబోస్తున మోదీ షా ద్వయం గత ఎనిమిదేండ్లలో తెలంగాణకు ఏం చేశారో జాతీయ కార్యవర్గం సాక్షిగా జవాబివ్వాలి. జాతినుద్దేశించి మాట్లాడనున్న ప్రధాని మోదీ.. తెలంగాణకు ఏమిచ్చారు? తెలంగాణకు ఏం చేశారో సమాధానమివ్వాలని తెలంగాణ సమాజం అడుగుతున్నది. కనీసం 2014లో రాష్ట్ర పునర్వ్యవస్థీకరణ చట్టంలో పొందుపరిచిన హామీల్లో ఒక్కదాన్నైనా నెరవేర్చారా అన్న ప్రశ్నకు జవాబివ్వాలని కోరుతున్నది.
పోలవరానికి జాతీయ హోదా ఇచ్చిన నేపథ్యంలో తెలంగాణలో ఒక ప్రాజెక్టుకు జాతీయ హోదా ఇవ్వాలని విభజన చట్టంలో పేర్కొన్న హామీని ఎందుకు నెరవేర్చలేదు? పైగా తమ పాలితరాష్ర్టాల్లో ప్రాజెక్టులకు జాతీయ హోదా ఇచ్చి.. తెలంగాణలో ఏ ఒక్క ప్రాజెక్టుకూ ఇవ్వకపోవడం వివక్ష కాదా?