హరిప్రియ విద్యకు కేటీఆర్‌ సాయం

ట్వీట్‌ చేసిన 24 గంటల్లోనే నిరుపేద చదువుకు భరోసా
విద్యార్థిని కృతజ్ఞతలు.. గుడ్‌లక్‌ చెప్పిన మంత్రి
హైదరాబాద్‌, ఆగస్టు 5 (నమస్తే తెలంగాణ): న్యాయవిద్య అభ్యసించేందుకు సాయం చేయండంటూ ట్వీట్‌ చేసిన 24 గంటల్లోనే ఓ పేద విద్యార్థినికి ఐటీశాఖ మంత్రి కేటీఆర్‌ అండగా నిలిచారు. పేదరికం వల్ల ఖర్చులు భరించలేకపోతున్నానంటూ చేసిన విజ్ఞప్తికి స్పందించి చదువుకు భరోసా ఇచ్చారు. ‘కేటీఆర్‌ సర్‌ నా పేరు అంతగిరి హరిప్రియ. హైదరాబాద్‌లోని నల్సార్‌ యూనివర్సిటీలో నాకు బీఏ ఎల్‌ఎల్‌బీ సీట్‌ వచ్చింది. ఖర్చులను భరించలేం. మేము చాలా పేదవాళ్లం. మా నాన్న రోజు కూలీ. దయచేసి కొంత ఆర్థికసాయం చేయండి’ అని బుధవారం ట్వీట్‌ చేసింది. దీనిపై స్పందించిన కేటీఆర్‌.. ‘నువ్వు సాధించిన దానికి కృతజ్ఞతలు హరిప్రియా. గుడ్‌ లక్‌ ఎట్‌ నల్సార్‌’ అని రిప్లయ్‌ ఇచ్చారు. 24 గంటల్లోనే హరిప్రియకు సాయం చేశారు. దానికి హరిప్రియ ‘సార్‌ ఈ రోజు మీరు చేసిన సాయానికి నేను ఎప్పటికీ రుణపడి ఉంటాను. నా చదువు కోసం మీ విలువైన సమయం, ఆర్థిక సాయా న్ని అందించినందుకు ధన్యవాదాలు. నా సమస్యను 24 గంటల్లో పరిష్కరించేందుకు కృషిచేసిన మీ బృందానికి కృతజ్ఞతలు. నేను మీ అందరికీ నమస్కరిస్తున్నా’ అంటూ కేటీఆర్‌ను కలుసుకున్న ఫొటోలను గురువారం ట్వీట్‌ చేశారు. ‘హరిప్రియకు సాయం చేసినందుకు ఆనందంగా ఉన్నది. గుడ్‌ లక్‌’ అని కేటీఆర్‌ బదులిచ్చారు.