వచ్చే ఏడాది కలరా వ్యాక్సిన్‌

హైదరాబాద్‌ కేంద్రంగా మరో కీలక వ్యాక్సిన్‌ ఉత్పత్తి కానున్నది. నోటి ద్వారా కలరా నిర్మూలనకు అవసరమైన వ్యాక్సిన్‌ టెక్నాలజీని అంతర్జాతీయ ఫార్మా సంస్థ ఇంటర్నేషనల్‌ వ్యాక్సిన్‌ ఇన్‌స్టిట్యూట్‌ స్థానిక బయాలాజికల్‌-ఈ ఫార్మా కంపెనీకి అప్పగించింది. వచ్చే ఏడాది నుంచి ఇక్కడ ఓరల్‌ కలరా వ్యాక్సిన్‌ ఉత్పత్తి కానున్నది.

• హైదరాబాద్‌ కేంద్రంగా మరో వ్యాక్సిన్‌ ఉత్పత్తి
• ఓరల్‌ వ్యాక్సిన్‌ టెక్నాలజీని దక్కించుకున్న బయాలాజికల్‌-ఈ ఫార్మా కంపెనీ
• ఇంటర్నేషనల్‌ ఇన్‌స్టిట్యూట్‌తో ఒప్పందం

హైదరాబాద్‌ సిటీబ్యూరో, మార్చి 20 (నమస్తే తెలంగాణ): హైదరాబాద్‌ కేంద్రంగా మరో కీలక వ్యాక్సిన్‌ ఉత్పత్తి కానున్నది. నోటి ద్వారా కలరా నిర్మూలనకు అవసరమైన వ్యాక్సిన్‌ టెక్నాలజీని అంతర్జాతీయ ఫార్మా సంస్థ ఇంటర్నేషనల్‌ వ్యాక్సిన్‌ ఇన్‌స్టిట్యూట్‌ స్థానిక బయాలాజికల్‌-ఈ ఫార్మా కంపెనీకి అప్పగించింది. వచ్చే ఏడాది నుంచి ఇక్కడ ఓరల్‌ కలరా వ్యాక్సిన్‌ ఉత్పత్తి కానున్నది. ఇప్పటికే కరోనా వ్యాక్సిన్‌ తయారీతో అంతర్జాతీయ ఫార్మా ఉత్పత్తి కేంద్రంగా హైదరాబాద్‌ గుర్తింపు సాధించింది. తాజా ఒప్పందంతో కలరా వ్యాక్సిన్‌ ప్రపంచానికి అందించే మరో అవకాశాన్ని దక్కించుకొని క్యాపిటల్‌ సిటీ ఆఫ్‌ ఫార్మాగా హైదరాబాద్‌ నిలువబోతున్నది.

భారత్‌తోపాటు రిపబ్లిక్‌ ఆఫ్‌ కొరియా, బంగ్లాదేశ్‌, సౌతాఫ్రికా వంటి దేశాలు కూడా ఈ వ్యాక్సిన్‌ ఉత్పత్తి చేయనుండగా, హైదరాబాద్‌ వేదికగా తయారుచేసిన వ్యాక్సిన్లను ప్రపంచ దేశాలకు ఎగుమతి చేయనున్నారు. ఇప్పటికే ప్రపంచ ఆరోగ్య సంస్థకు హైదరాబాద్‌ తొమ్మిది రకాల వ్యాక్సిన్లను అందిస్తుండగా, తాజా ఒప్పందంతో మరో వ్యాక్సిన్‌ను సరఫరా చేయబోతున్నది. ప్రపంచవ్యాప్తంగా ఎదురైన పోటీని నిలదొక్కుకొని ఈ అవకాశం దక్కించుకున్నామని, ప్రాణాంతక కలరా నిర్మూలనలో బయాలాజికల్‌ ఈ భాగస్వామ్యం కావడం, ఫార్మా రంగంలో తమ బాధ్యతను మరింత పెంచిందని, సురక్షితమైన విధానంలో ప్రపంచానికి వ్యాక్సిన్‌ అందించడమే లక్ష్యంగా తాము కృషి చేస్తామని ఆ కంపెనీ మేనేజింగ్‌ డైరెక్టర్‌ మహిమ దాట్ల బుధవారం ఒక ప్రకటనలో తెలిపారు.