TS Weather | హైదరాబాద్, జూలై 7 (నమస్తే తెలంగాణ): రాష్ట్రంలో శని, ఆదివారాల్లో తేలికపాటి నుంచి మోస్తరు వర్షాలు కురిసే అవకాశం ఉందని హైదరాబాద్ వాతావరణ కేంద్రం తెలిపింది. ఉత్తర తెలంగాణలో ఉరుములు, మెరుపులతో కూడిన వర్షాలు అక్కడక్కడ కురిసే అవకాశం ఉందని వివరించింది. అమెరికా నేషనల్ సెంటర్ ఫర్ ఎన్విరాన్మెంటల్ ప్రిడిక్షన్, భారత వాతావరణ శాఖ తెలిపిన వివరాలిలా ఉన్నాయి… దక్షిణ చైనా సముద్రం, పశ్చిమ పసిఫిక్ నుంచి ఇండో-చైనా అంతటా పెరుగుతున్న రుతుపవనాల ప్రభావం, తుఫాను ప్రసరణలు, అల్పపీడన ప్రాంతాల ఏర్పాటు కారణంగా జూలై చివరి వారం వరకు నైరుతి రుతుపవనాల ప్రభావం చురుకుగా ఉంటుంది.
పశ్చిమ పసిఫిక్ మీదుగా దక్షిణ చైనా సముద్రం వైపు కదులుతూ తుఫాను ఏర్పడే అవకాశం ఉంది. ఈ తుఫాను బంగాళాఖాతం, దాని పరిసర ప్రాంతాల్లో ప్రభావం చూపించనున్నది. జూలై 12 నుంచి 18 వరకు తూర్పు భారతదేశంలో వర్షం కురిసే అవకాశం ఉంది. ఇది తదుపరి వారం వరకు కొనసాగుతుంది. జూలై 14 నుంచి 17 వరకు పశ్చిమబెంగాల్ తీరం వెంట తుఫాను తీవ్రత ఉంటుంది. ఫలితంగా భారీ వర్షాలు కురిసే అవకాశాలున్నాయని భారత వాతావరణ శాఖ తెలిపింది.