హైదరాబాద్ సిటీబ్యూరో, మే 11 (నమస్తే తెలంగాణ): అపాయింట్మెంట్ లభ్యతలో ఎదురుచూపులు లేకుండా తత్కాల్, సాధారణ, పీసీసీ క్యాటగిరీలను కలుపుకుని 7,150 అపాయింట్మెంట్స్ ఈ నెల 15 నుంచి 31 వరకు విడుదల చేయనున్నట్టు హైదరాబాద్ రీజినల్ పాస్పోర్ట్ అధికారి దాసరి బాలయ్య గురువారం ఒక ప్రకటనలో పేర్కొన్నారు. నగరంలోని బేగంపేట, అమీర్పేట, టోలిచౌకీ, నిజామాబాద్, కరీంనగర్ పాస్పోర్ట్ సేవా కేంద్రాల్లో ప్రతి రోజు 550 అపాయింట్మెంట్స్ అందుబాటులో ఉంటాయని చెప్పారు.
ఈ అదనపు అపాయింట్మెంట్స్ ప్రతి శుక్రవారం, బుధవారం సాయంత్రం 4:30 గంటలకు విడుదల చేస్తారని అన్నారు. దరఖాస్తు చేసుకున్న వారు రీషెడ్యూల్ చేసుకోవచ్చని సూచించారు. వివరాలకు www.passportindia.gov.in పోర్టల్ను సంప్రదించాలని అన్నారు. అపాయింట్మెంట్స్లో సుదీర్ఘ నిరీక్షణ లేకుండా ఏప్రిల్ 26 నుంచి ఈ నెల 12 వరకు అదనపు అపాయింట్మెంట్లు 5,500 విడుదల చేసినట్టు తెలిపారు. ప్రత్యేక పాస్పోర్ట్ డ్రైవ్ ద్వారా శనివారం 3,056 అపాయింట్మెంట్ల ప్రక్రియ పూర్తి చేసినట్టు దాసరి బాలయ్య వివరించారు.