రక్షణశాఖ భూములను అప్పగించండి

రక్షణశాఖ పరిధిలో ఉన్న భూములను రాష్ట్ర ప్రభుత్వానికి బదలాయించాలని, ప్రత్యామ్నాయ రోడ్ల నిర్మాణానికి సహకరించాలని సీఎస్‌ సోమేశ్‌కుమార్‌ కేంద్ర రక్షణశాఖ కార్యదర్శి గిరిధర్‌కు విజ్ఞప్తి చేశారు.

• ఏవోసీ పరిధిలో ప్రత్యామ్నాయ రోడ్లు నిర్మిస్తాం : సీఎస్‌
• కేంద్ర రక్షణశాఖ కార్యదర్శికి వినతి

హైదరాబాద్‌, డిసెంబర్‌ 29 (నమస్తే తెలంగాణ): రక్షణశాఖ పరిధిలో ఉన్న భూములను రాష్ట్ర ప్రభుత్వానికి బదలాయించాలని, ప్రత్యామ్నాయ రోడ్ల నిర్మాణానికి సహకరించాలని సీఎస్‌ సోమేశ్‌కుమార్‌ కేంద్ర రక్షణశాఖ కార్యదర్శి గిరిధర్‌కు విజ్ఞప్తి చేశారు. సీఎం కేసీఆర్‌ ఆదేశాల మేరకు సీఎస్‌ గురువారం న్యూఢిల్లీలో పలువురు కేంద్ర మంత్రిత్వశాఖల కార్యదర్శులను కలిసి రాష్ట్రంలో అపరిష్కృతంగా ఉన్న పలు సమస్యలను విన్నవించారు. దీర్ఘకాలంగా పెండింగ్‌లో ఉన్న రక్షణ భూముల సమస్యలపై చర్చించారు.

సికింద్రాబాద్‌ ఏవోసీ రోడ్ల మూసివేతకు బదులుగా ప్రత్యామ్నాయ రోడ్ల నిర్మాణానికి రక్షణశాఖ భూమిని అప్పగించాలని, మెహిదీపట్నంలో సైవాక్‌ నిర్మాణానికి అనుమతి ఇవ్వాలని, రాష్ట్రంలోని వివిధ ప్రాంతాల్లో ఎలివేటెడ్‌ కారిడార్లు, లింక్‌ రోడ్ల నిర్మాణం, రోడ్ల విస్తరణకు రక్షణశాఖ భూముల కేటాయింపు తదితర అంశాలను కేంద్ర రక్షణశాఖ కార్యదర్శి దృష్టికి తీసుకెళ్లారు. జాతీయ ఉపాధి హామీ పథకం నిధుల చెల్లింపు సమస్యలు పరిష్కరించాలని కేంద్ర గ్రామీణాభివృద్ధి శాఖ కార్యదర్శి శైలేశ్‌ కే సింగ్‌కు విన్నవించారు. రాష్ట్రంలో వరి ధాన్యం ఆరబోసేందుకు ఉపాధి హామీ పథకం నిధులతో కల్లాలు నిర్మిస్తున్నట్టు సీఎస్‌ ఆయనకు వివరించారు.