ములుగు జిల్లాలో మందు పాతర నిర్వీర్యం

ములుగు జిల్లా వెంకటాపురం(నూగూరు) మండల పరిధిలోని వీరభద్రాపురం గ్రామ అటవీ సమీపంలో సాధారణ పౌరులు తిరిగే ప్రాంతంలో మావోయిస్టులు అమర్చిన నాలుగు మందుపాతరలను గుర్తించినట్టు ఎస్పీ డాక్టర్‌ పీ శబరీష్‌ తెలిపారు.

ములుగు, జూన్‌ 9 (నమస్తేతెలంగాణ): ములుగు జిల్లా వెంకటాపురం(నూగూరు) మండల పరిధిలోని వీరభద్రాపురం గ్రామ అటవీ సమీపంలో సాధారణ పౌరులు తిరిగే ప్రాంతంలో మావోయిస్టులు అమర్చిన నాలుగు మందుపాతరలను గుర్తించినట్టు ఎస్పీ డాక్టర్‌ పీ శబరీష్‌ తెలిపారు. అందులో మూడు మందు పాతరలు పేలడంతో ఒక ముళ్లపంది, కొండెంగతోపాటు మరో పెంపుడు కుక్క చనిపోయిందని, వాటి కళేబరాలను గుర్తించినట్టు చెప్పారు. అదే ప్రాంతంలో అమర్చిన మరో మందు పాతరను బీడీ టీమ్‌ పోలీసులు నిర్వీర్యం చేసినట్టు పేర్కొన్నారు. మావోయిస్టులు మందుపాతర్లను అమర్చడం ద్వారా అమాయక ప్రజల ప్రాణాలతోపాటు వన్య ప్రాణులు, పెంపుడు జంతువులు బలవుతున్నాయని తెలిపారు. ఎవరికి ఎలాంటి హానీ జరగకుండా మావోయిస్టులు అటవీ ప్రాంతాల్లో అమర్చిన మందు పాతర్లను వెంటనే తొలగించాలని సూచించారు.