ఆర్మూర్ : ఎంతో ప్రతిష్టాత్మకంగా తల పెట్టిన ఆర్మూర్ అర్బన్ పార్క్ తెలంగాణకే తలమానికం
కానుందని పీయూసీ చైర్మన్,ఆర్మూర్ ఎమ్మెల్యే ఆశన్నగారి జీవన్ రెడ్డి వెల్లడించారు. ఆరు కిలోమీటర్ల వాకింగ్ ట్రాక్ ఉన్న ఉన్న ఏకైక పార్క్ , తెలంగాణలోనే అతిపెద్ద వాచ్ టవర్ ను త్వరలో ముఖ్యమంత్రి కేసీఆర్ చేతుల మీదుగా ప్రారంభించబోతున్నామని ప్రకటించారు. నమస్తే నవనాధపురం కార్యక్రమంలో భాగంగా శనివారం మాక్లూర్ మండలంలోని చిన్నాపూర్ గ్రామం వద్ద ఆర్మూర్ అర్బన్ పార్క్ నిర్మాణం పనులను ఆయన పరిశీలించారు.
ఈ సందర్భంగా అధికారులతో సమావేశమై పార్క్ నిర్మాణంలో భాగంగా చేపట్టిన పనుల పురోగతిని సమీక్షించారు. అటవీశాఖ పర్యవేక్షణలో ఆర్మూర్ అర్బన్ పార్క్ నిర్మాణం జరుగుతున్నదన్నారు. మొత్తం 470 ఎకరాల్లో చేపట్టిన ఈ పార్క్ నిర్మాణాన్ని నెల రోజుల్లోగా పూర్తి చేయనున్నట్లు తెలిపారు. ఈ పార్కులో నిర్మాణం వంటి పనులకు ఇప్పటికే ఆరు కోట్ల రూపాయలను ఖర్చు చేసినట్లు జీవన్ రెడ్డి వివరించారు. ఈ నిధులను మంజూరు చేసిన సీఎం కేసీఆర్, మంత్రి కేటీఆర్ లకు రుణపడి ఉంటామన్నారు.
మరో అయిదు కోట్ల రూపాయల ఖర్చుతో పార్కు సమీపంలో ఉన్న చిన్నపూర్ చెరువుతో పాటు గాజులకుంట, ఇనాయి కుంటలను పర్యాటక కేంద్రంగా అభివృద్ధి చేస్తామన్నారు. బోటింగ్ ఏర్పాటు, మినీ ట్యాంక్ బండ్ ల నిర్మాణం వంటి పలు పనులు చేపడతామన్నారు. 300ఎకరాల అటవీ విస్తీర్ణం స్పష్టంగా కనిపించేలా ఎతైన గుట్టపై 30ఫీట్ల ఎత్తులో వాచ్ టవర్ ను నెలకొల్పామని వెల్లడించారు. ఈ వాచ్ టవర్ లో మూడు ఫ్లోర్లు ఉన్నాయన్నారు.ఈ వాచ్ టవర్ తెలంగాణ రాష్ట్రంలోనే అతిపెద్ద దవుతుందన్నారు.